މި ހިނގާ 2024 ވަނަ އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ހަތަރު ލައްކައިން މައްޗަށް އަރައި، ޖުމްލަ 441،000 ފަތުރުވެރިން ރާއްޖެ އައިސްފައިވާ ކަމަށް ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އާންމުކޮށްފައިވާ މައުލޫމާތުތަކަށް ބަލާއިރު، މި އަހަރު ދުވާލެއްގެ މައްޗަށް އެވްރެޖުކޮށް 8،000 ފަތުރުވެރިން ރާއްޖެ އާދެއެވެ. މިއީ މިދިޔަ އަހަރުގެ މި މުއްދަތުގައި ރެކޯޑު ކުރެވިފައިވާ 7،300 ގެ އެވްރެޖާ އަޅާބަލާއިރު ފާހަގަކޮށްލެވޭ އިތުރުވުމެކެވެ. ވަކިވަކި މަސްތަކަށް ބަލާއިރު، ނިމިދިޔަ ޖެނުއަރީ މަހު 227،000 ފަތުރުވެރިން ޒިޔާރަތްކުރިއިރު، މި ހިނގާ މަހު ރާއްޖެއަށް ވަނީ 217،000 ފަތުރުވެރިން އައިސްފައެވެ. މިއީ މިދިޔަ އަހަރަށްވުރެ ގާތްގަނޑަކަށް 40،000 ފަތުރުވެރިން އިތުރު އަދަދެކެވެ.
ފަތުރުވެރިންގެ އިތުރުން އެހެނިހެން ބޭނުންތަކުގައި އައި މީހުންނާއެކު، ޖުމްލަ ޒިޔާރަތްކުރި މީހުންގެ އަދަދު ވަނީ 444،000 އަށް އަރާފައެވެ. އޭގެ ތެރޭގައި ވިޔަފާރި ބޭނުންތަކަށް އައި 1،300 މީހުންނާއި ކްރޫޒްލައިނާތަކުން އައި 1،000 މީހުން ހިމެނެއެވެ. މާކެޓްތަކަށް ބަލާއިރު، ލިސްޓުގެ އެއްވަނައިގައި އުޅެނީ ޗައިނާއެވެ. އެ ގައުމުން މިހާތަނަށް 72،000 އަށްވުރެ ގިނަ ފަތުރުވެރިން އައިސްފައިވާއިރު، ދެވަނައަށް އެންމެ ގިނަ މީހުން އައީ ރަޝިއާއިންނެވެ. އަދި ތިންވަނަ މަގާމުގައި އޮތީ އިޓަލީވިލާތެވެ.
ރާއްޖެ އައި ފަތުރުވެރިންގެ ތެރެއިން ބޮޑު އިންސައްތައެއް، އެއީ ތިން ލައްކައަށްވުރެ ގިނަ މީހުން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. މީގެ އިތުރުން ގެސްޓްހައުސްތަކުގައި ލައްކައެއްހާ ފަތުރުވެރިން އަދި ސަފާރީތަކުގައި 12،000 އަށްވުރެ ގިނަ ފަތުރުވެރިން ވަނީ ޗުއްޓީ ހޭދަކޮށްފައެވެ. ރާއްޖޭގައި ފަތުރުވެރިންނަށް ހިދުމަތް ދިނުމަށް 45،000 އަށްވުރެ ގިނަ އެނދު ހުރިއިރު، މިދިޔަ އަހަރު ނިމުނުއިރު ރާއްޖެއަށް ޖުމްލަ 2.2 މިލިއަން ފަތުރުވެރިން ޒިޔާރަތްކޮށްފައިވާކަން ފާހަގަކޮށްލެވެއެވެ.
ކޮމެންޓު ފޮނުވާ