ބޮލީވުޑް އެކްޓުރެސް ޝިލްޕާ ޝިރޯދްކަރ އަކީ ކޮރޯނާ ވައިރަސް އާއި ދެކޮޅަށް އުފައްދާފައިވާ ވެކްސިން ޖެހި ބޮލީވުޑްގެ ފުރަތަމަ ތަރިއެވެ. މިވަގުތު ދުބާއީގައި ހުރި ޝިލްޕާ ޝިރޯދްކަރ ކޮވިޑްވެކްސިން ޖަހާފައިވަނީ ޔޫއޭއީ އިންނެވެ.
އީޓައިމްސްއިން ޝިލްޕާގެ ހާލަތާއި ބެހޭގޮތުން ސުވާލުކުރުމުން ބުނެފައިވަނީ "ސިނޯފާމް" ވެކްސިންގެ ފުރަތަމަ ޑޯޒް ޖެހުމުން ވަރަށް އުފާވާ ކަމަށެވެ. ޝިލްޕާ ބުނެފައިވަނީ ވެކްސިން ޖެހުމުން ވަރަށް ގިނަ މީހުން ދެން މާސްކުއަޅަން ނުޖެހޭނެއްނުހޭ ބުނެފައި ވާކަމަށެވެ.
ނަމަވެސް ވެކްސިން ޖެހިޔަސް އެހެންމީހުންގެ ރައްކާތެރިކަމަށާއި އަމިއްލަ މީހާގެ ރައްކާތެރިކަމަށްވެސް މާސްކުއަޅަން ވާނެކަމަށް ވަނީ ބުނެފައެވެ. އަދި އޭނާގެ އާއިލާއިންވެސް އޭނާ ފިޔަވާ އެކަކުވެސް ވެކްސިން ނުޖަހާ ކަމަށާއި ދެން އެންމެ އަވަހަށް ޖަހާނީ ދަރިފުޅުގަޔަށް ކަމުގައެވެ.
ޝިލްޕާ ބުނެފައިވަނީ އެންމެންވެސް ވެކްސިން އާއި މެދުގައި ޕޮސިޓިވްކޮށް ވިސްނުމަށެވެ. އަދި އޭނާގެ ދެވަނަ ޑޯޒް ޖަހަންޖެހެނީ ޖެނުއަރީ 27 ގައިކަމަށާއި އޭނާގެ ހާލަތު އަދި ރަނގަޅުކަމަށެވެ.
ޝިލްޕާ ފެނިގެންގޮސްފައިވާ ފިލްމު ތަކުގެތެރޭ "ހަމް"، "ގޯޕީ ކިޝާން"، "ކިޝަން ކަނައްޔާ"، "ހުދާ ގަވާ" އަދި މިދިޔަ އަހަރުގެ ފިލްމ "ގަންސް އޮފް ބަނާރަސް" ފަދަ ފިލްމުތައް ފާހަގަކޮށްލެވެއެވެ. މީގެ އިތުރުން އޭނާ ވަނީ ޑްރާމާ ސީރީޒް ތަކުންވެސް ފެނިގެން ގޮސްފައިއެވެ.
