އެމެރިކާގެ ސެނެޓްގައި ޓްރަމްޕްގެ އިމްޕީޗްމަންޓްގެ މަރުހަލާ ފެށުމުގެ ކުރިން، އެގައުމުގެ މިހާރުގެ ރައީސް ޑޮނަލްޑް ޓަރަމްޕް މަގާމުން ވަކި ކުރުމުގެ ޕްލޭން ތައްޔާރުކޮށް، ސެނެޓްގެ ރައީސާ ނާންސީ ޕެލޮސީ، ސެނެޓްގެ މެމްބަރުނާއި ނޯޓިސް ހިއްސާކޮށްފިއެވެ.
މި ޕްލޭންގައި ވާގޮތުން، ހައުސް އޮފް ރެޕްރެސެންޓޭޓިވްސްގެ މެމްބަރުން، އެމެރިކާގެ ތިރިގޭގައި، ރައީސް ޑޮނަލްޑް ޓަރަމްޕް މަގާމުން ދުރުކޮށް، ވަގުތީ ރައީސްކަމާ ހަވާލު ވެވަޑައިގަތުމަށް މިހާރުގެ ނާއިބު ރައީސަށް ގޮވާލާ ގަރާރެއް ފާސްކުރާނެއެވެ.
މިއަށްފަހު، ތިރިގޭގެ ޑިމޮކްރަޓިކް ޕާޓީއަށް ނިސްބަތްވާ މެމްބަރުން، އެމެރިކާގެ ގާނޫނު ހަދާ މަޖިލީހަށް ވަދެ އޭނާގެ ސަޕޯޓަރުން ހަމަނުޖެހުން ހިންގުމަށް ހިތްވަރު ދީފައިވާތީ، "މުވައްސަސާއަކާ ދެކޮޅަށް ހަމަ ނުޖެހުން ހިންގުމުގެ" މައްސަލާގައި ދައުވާ ކުރުމުގެ މައްސަލަށް މަޖިލީހަށް ހުށަހަޅާނެއެވެ.
މި މައްސަލަތައް ގާނޫނު ހަދާ މަޖިލިހުން ފާސްކުރުމަށް ބާއްވާ ފުރަތަމަ ވޯޓު މިހަފްތާފެ ހޯމަ ދުވަހު ބޭއްވިގެންދާނެއެވެ.
މިހަފްތާގެ އާދީއްތަދުވަހު، ސެނެޓްގެ ރައީސާވަނީ، ޓަރަމްޕް މަގާމުން ދުރުކޮށް، އެމެރިކާގެ ގާނޫނު އަސާސީއަށް ގެނެވިފައިވާ 25 ވަނަ އިސްލާހުގެ ބޭނުންކޮށްގެން، މިހާރުގެ ނައިބު ރައީސް މައިކް ޕެންސް ވަގުތީ ރައީސްކަމާ އޭނާ ހަވާލުވެ ވަޑައިގަތުމަށް ގޮވާލާ ގަރާރު ގާނޫނު ހަދާ މަޖިލީހުން ފާސްކުރުމަށް ތައްޔާރު ކުރެވިފައިވާ ޕްލޭންގެ ހުރިހާ ތަފްސީލެއް މެމްބަރުންނަށް ފޮނުވާފައެވެ.
ގާނޫނު އަސާސީގެ 25 ވަނަ އިސްލާހުގެ ބޭނުންކޮށްގެން ރައީސް ޓްރަމްޕް މަގާމުން ދުރުކޮށް، ވަގުތީ ރައީސްކަމާ ހަވާލުވުމުގެ ފުރުސަތު ނާއިބް ރައީސް މައިކް ޕެންސަށް ފަހިކޮށްދެއެވެ.
އެމެރިކާގެ ގާނޫނު އަސާސީގެ 25 ވަނަ މާއްދާއަށް ގެނެވިފައިވާ އިސްލާހުގައި ވާގޮތުން، ނާއިބް ރައީސް ޕެންސް މިކަމަށް އިސްނަންގަވާ އަދި ކެބިނެޓް 8 ވަޒީރަކު ޕެންސްއާއި ގުޅިވަޑައިގެން ޓްރަމްޕާއި ދެކޮޅަށް ތެޖުވެއްޖެ ނަަމަ، ޓްރަމްޕް މަގާމުން ދުރުކުރުމުގެ ފުރުސަތު ލިބިގެންދެއެވެ. އެހެންނަމަވެސް، މިހާތަނަށް ބެލެވެމުން މިއީ ވުމަށްވުރެ ނުވުން ގާތްކަމެއްގެ ގޮތުގައެވެ.
ސެނެޓްގެ ރައީސާ މެމްބަރުންނަށް ފޮނުއްވި ސިޓީގައި ވިދާޅުވެފައިވަނީ، ޓްރަމްޕް މަގާމުން ދުރުކޮށް ވަގުތީ ރައީސް ކަމާ ނާއިބް ރައީސް ޕެންސް ހަވާލު ވެވަޑައިގަތުމަކީ، އެންމެ ފުރަތަމަ މަރުހަލާ ކަމަށާއި، އެއަށްފަހު، ޓަރަމްޕްގެ މައްޗަށް ގާނޫނުގައި ހަދާ މަޖިލީހުގައި ތަހުގީގުކޮށް، އަދި ފިޔަވަޅު އެޅުމާބެހޭ (އިމްޕީޗް ކުރުމާބެހޭ) ޚާއްސަ ގާނޫނުއް ގާނޫނު ހަދާ މަޖިލިހުގެ ތިރިގެއަށް ހުށަހެޅިގެންދާނެ ކަމަށެވެ.
ސީނިއަރ ޑިމިކްރަޓެއް ކަމުގައިވާ، ގާނޫނުހަދާ މަޖިލިހުގެ ތިރިގޭގެ 'ހައުސް ވިޕް' ޖޭމްސް ކްލައިބާން ވިދާޅުވެފައިވަނީ، ޓްރަމްޕްގެ މައްޗަށް އެމެރިކާގެ ސެނެޓްގައި ހިންނޭ ޝަރުއީ މަރުހަލާތަކުގެ ކުރިން ހައުސް އޮފް ރެޕްރެސެންޓޭޓިވްސްގައި ނަގަންޖެހޭ އިމްޕީޗްމަންޓް ވޯޓު މިހަފްތާގައި ބޭއްވޭނެ ކަމުގައެވެ. އަދި އޭނާ އިތުރަށް ވިދާޅުވިގޮތުގައި، ސެނެޓްގައި ކުރިޔަށްދާ މަރުހަލާތައް، ކުރިޔަށް ދާނީ، އެމެރިކާގެ އިންތިޚާބީ ރައީސް ޖޯބައިޑްން ހުވާކުރައްވާ، ސަރުކާރު ރަގަޅަށް ހިގައިގަންނަން ހޭދަވެގެންދާ ފުރަތަމަ 100 ދުވަހަށް ފަހުގައެވެ.
އޭނާ ވިދާޅުވި ގޮތުގައި މި 100 ދުވަހުގެ ތެރޭގައި ޖޯ ބައިޑްންއަށް އޭނާގެ ކެބިނެޓަށް ރުހުން ހޯދާ، އަދި ކޯވިޑް ޕެންޑަމިކާ ގުޅޭ ހުރިހާ ސިޔާސަތެއްވެސް ފުރިހަމަޔަށް ތަންފީޒުކުރަން ފެށިގެންދާނެ ކަމަށެވެ. މި 100 ދުވަހުގެ ތެރޭގައި އިމްޕީޗްމަންޓް އާޓިކަލް އެމެރިކާގެ ސެނެޓަށް ހުށަހަޅައިފިނަމަ، ކެބިނެޓަށް ރުހުން ދިނުމާއި އަދި ކޯވިޑް ޕެންޑަމިކާ ގުޅުންހުރި ކަންކަމަށް ބުރޫ އަރާފާނެކަމަށް ގިނަ މެމްބަރުން ދެކެވަޑައިގަންނަވައެވެ.
ގާނޫނު ހަދާ މަޖިލިހުން ޓްރަމްޕް މަގާމުން ދުރުކުރުމަށް މިހާރު ކުރަމުންދާ މަސައްކަތްތަކާ ގުޅޭގޮތުން، ޓުވިޓައއާއި އަދި އެނޫންވެސް ގިނަ ސޯޝަލް މީޑިއާ ޕްލެޓްފޯމްތަކުން ސަސްޕެންޑް ކުރެވިފައިވާތީ، މިހާތަނަށް އެއްވެސް ކޮމެންޓެއް ޓްރަމްޕް ކޮށްފައެއް ނުވެއެވެ.
އެހެންނަމަވެސް، އާދީއްތަ ދުވަހު ވައިޓްހައުސް އިން ހާމަ ކޮށްފައިވާ ގޮތުގައި، މިފަހްތާގެ އަންގާރަ ދުވަހު ޓްރަމްޕް ޓެކްސަސްއަށް ޒިޔާރަތް ކުރައްވާނެއެވެ. ޓްރަމްޕް ޓެކްސަސްއަށް ޒިޔާރަތް ކުރައްވަނީ، މެކްސިކޯ އަދި އެމެރިކާ އިންވެގެން އޮންނަ ސަރަހައްދުގައި ބިނާކޮށްފައިވާ ބޯޑަރު ބިނާކުރުމަށް ޓަރަމްޕްގެ ސަރުކާރުން ކޮށްފައިވާ މަސައްކަތްތައް ފާހަގަ ކުރުމުގެ ގޮތުންނެވެ.
ޓަރަމްޕް މަގާމުން ވަކިކުރުމުގެ މަސައްކަތްތައް ބާރަށް ކުރިޔަށް ދާއިރު، ޓްރަމްޕް ނިސްބަތްވާ ރިޕަބްލިކަން ޕާޓީގެ ބައެއް މެމްބަރުންވެސް މިހާރު ގޮވާލަވަމުން ގެންދަވަނީ އޭނާ މަގާމުން އިސްތިއުފާ ދެއްވުމަށެވެ.
