ރާއްޖެއަށް މަސްތުވާތަކެތި އެތެރެކޮށް އޭގެ ވިޔަފާރިން ހޯދާ ފައިސާ ލޯންޑާކުރާ ބޮޑު ނެޓްވޯކެއް ފުލުހުން ހިންގި ހާއްސަ އޮޕަރޭޝަނެއްގައި ހޯދައި، އެކަމުގައި ޝާމިލުވާ ގއ. ވިލިނގިލީ ހަތަރު މީހަކު ހައްޔަރުކޮށްފިއެވެ. ފުލުހުން ހާމަކުރި ގޮތުގައި 2015 ވަނަ އަހަރުން ފެށިގެން ހަރަކާތްތެރިވަމުން އަންނަ މި ނެޓްވޯކްގެ މެންބަރުންގެ ބޭންކު އެކައުންޓުތަކުން ފާއިތުވި ފަސް އަހަރު ތެރޭގައި 300 މިލިއަނަށްވުރެ ގިނަ ރުފިޔާ ދައުރުކޮށްފައިވެއެވެ.
މާލެއާއި ގއ. އަތޮޅުގައި ހިންގި މި އޮޕަރޭޝަންގައި 10 ތަނެއް ބަލައިފާސްކޮށް ހައްޔަރުކޮށްފައިވަނީ ޝައްފާހު ލަތީފު، އަހުމަދު މަދީހް، އަހުމަދު އަނާމް އިބްރާހިމް އަދި ނޫރުއްނިޒާމްއެވެ. ތަހުގީގުން ހާމަވި ގޮތުގައި މީގެ ތެރެއިން ބައެއް މީހުންނަށް މުސާރައިގެ ގޮތުގައި ކުޑަ މިންވަރެއް ލިބުނު ނަމަވެސް، އެމީހުންގެ އެކައުންޓުތަކުން މިލިއަނުން ފައިސާ ދައުރުވެފައިވެއެވެ. އެގޮތުން މަދީހަށް މުސާރައިގެ ގޮތުގައި 4 ލައްކަ ރުފިޔާ ލިބުނުއިރު އޭނާގެ އެކައުންޓުން 17 މިލިއަން ރުފިޔާ ދައުރުވެފައިވާއިރު، އަނާމްގެ މުސާރައަކީ 2 ލައްކަ ރުފިޔާ ނަމަވެސް އޭނާގެ އެކައުންޓުން 38 މިލިއަން ރުފިޔާ ދައުރުވެފައިވާކަން ފާހަގަކުރެވިފައިވެއެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން 13 ފަރާތެއްގެ 53 ބޭންކު އެކައުންޓު މިހާރު ވަނީ ފްރީޒްކޮށްފައެވެ. އަދި މި ނެޓްވޯކް އިސްވެ ހިންގާ ފަރާތްތަކާއި މަނީ ލޯންޑާކުރުމުގައި ބައިވެރިވާ އިތުރު 19 މީހަކު ދެނެގަނެވި، އެ މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ.
ކޮމެންޓު ފޮނުވާ