މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ހުއްދަ ދީފައިވާ ގޮތާއި ހިލާފަށް ބައެއް މަރުކަޒުތަކުން އޮންލައިން ކޯސްތައް ހިންގަމުން އަންނަ ކަމަށް އެ އިދާރާ އިން މިއަދު ބުނެފި އެވެ. މިގޮތަށް ހިންގާ ކޯސްތަކުގެ ސަނަދު ގަބޫލުނުކުރާނެ ކަމަށް އެމްކިއުއޭ އިން އިންޒާރުދީފައިވެ އެވެ.
އެމްކިއުއޭ އިން މިއަދު ނެރުނު ބަޔާނެއްގައި ބުނީ ނޭޝަނަލް ކޮމްޕީޓެންސީ ސްޓޭންޑާޑްތަކަށް އޮންލައިންކޮށް ކޯސްތައް ހިންގުމަށް މަޝްވަރާކުރަމުން ދިޔަ ނަމަވެސް މިހާތަނަށް އެއްވެސް މަރުކަޒަކަށް އެފަދަ ހުއްދައެއް ދީފައިނުވާ ކަމަށެވެ. އެހެންކަމުން އެ އޮތޯރިޓީގެ ހުއްދަ ނެތި އޮންލައިންކޮށް ހިންގާ ޕްރޮގްރާމްތަކުގެ ސަނަދު ގަބޫލުނުކުރާނެ ކަން ވަނީ ސާފުކޮށްދީފަ އެވެ.
ރާއްޖޭގައި ހިންގާ މަތީ ތައުލީމާއި ތަމްރީނު ޕްރޮގްރާމްތައް ފަރުމާކޮށް ފެންވަރު ކަށަވަރުކުރުމާއި، ހުއްދަ ދިނުމާއި، އެކްރެޑިޓް ކުރުމުގެ އިތުރުން އޮޑިޓް ކުރުމަކީ އެމްކިއުއޭގެ ޒިންމާއެކެވެ. މަތީ ތައުލީމު ދޭ މަރުކަޒުތަކާއި އެތަންތަނުގައި ކިޔަވައިދޭ ފަރާތްތަކުގެ ފެންވަރު ބެލުމަކީ ވެސް ރާއްޖޭގެ މަތީ ތައުލީމާއި ތަމްރީނުގެ ގާނޫނުގެ ދަށުން އެ އޮތޯރިޓީގެ މަސްއޫލިއްޔަތެކެވެ. ހުއްދަ ނެތި ކޯސްތައް ހިންގައި ސެޓްފިކެޓް ދޭ މައްސަލަ މީގެ ކުރިން ވެސް އެކި ފަހަރު މަތިން ފެންމަތިވެފައިވެ އެވެ.
ކޮމެންޓު ފޮނުވާ