ރާއްޖޭގައި ހާސިލްކުރާ ޕީއެޗްޑީ ނުވަތަ އެއާ އެއްވަރުގެ ސަނަދެއް ގަބޫލުކުރުމަށް ފުލްޓައިމްކޮށް މަދުވެގެން ތިން އަހަރު ނުވަތަ ޕާޓްޓައިމްކޮށް ހަ އަހަރު ފުރިހަމަކުރަންޖެހޭ ކަމަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން މިއަދު ބުނެފިއެވެ.
އެ އިދާރާއިން ގެޒެޓުގައި ކުރި އިޢުލާނުގައި ބުނީ ރާއްޖޭގެ ކޮލެޖުތަކާއި ޔުނިވާސިޓީތަކުން ހިންގާ ޕީއެޗްޑީ ޕްރޮގްރާމްތަކަށް ވަކި ޚާއްސަ އުސޫލެއް މިހާތަނަށް އާންމުކުރެވިފައި ނުވާކަމަށެވެ. ނަމަވެސް ބޭރުން ހާސިލްކުރާ ޕީއެޗްޑީ ގަބޫލުކުރުމަށް މިންގަނޑު ހަމަޖެހިފައިވާތީ، ރާއްޖޭގައި ހާސިލްކުރާ ޕީއެޗްޑީ ގަބޫލުކުރާނީ އެ މިންގަނޑަކާ އެއްގޮތަށް ކަމަށް އެމްކިއުއޭ ބޯޑުން ނިންމާފައިވާކަން އެ އިދާރާއިން ހާމަކުރިއެވެ.
އެ މިންގަނޑުގައި ޕީއެޗްޑީއަށް ކިޔެވުމަށް 360 ކްރެޑިޓް ހަމަކުރަން ޖެހޭކަމަށާއި، މަދުވެގެން 36،000 ގަޑިއިރު ތިން އަހަރު ތެރޭގައި ފުރިހަމަކުރަންޖެހޭކަމަށް ބުނެފައިވެއެވެ. ވަޒީފާ އަދާކުރަމުންދާ ފަރާތްތަކަށް ދަތިވާނެ ކަމަށް ބަލައި، އެފަދަ ފަރާތްތަކުން ޕާޓްޓައިމްކޮށް ޕީއެޗްޑީ ހާސިލްކުރުމަށް އެމްކިއުއޭއިން ވަނީ ފުރުސަތު ހުޅުވާލައިފައެވެ.
ރާއްޖޭގެ މަތީ ތަޢުލީމާއި ތަމްރީނުދޭ މަރުކަޒުތަކުން ހިންގާ ޑޮކްޓޯރަލް ޑިގްރީ ޕްރޮގްރާމްތަކުގެ ފެންވަރު ބައިނަލްއަޤްވާމީ މިންގަނޑުތަކާ އެއްހަމައެއްގައި ހިފެހެއްޓުމަށްޓަކައި މި މިންގަނޑާ އެއްގޮތަށް ޢަމަލުކުރުމަށް އެމްކިއުއޭއިން އެ މަރުކަޒުތަކަށް އަންގައިފިއެވެ. ރާއްޖޭގައި ޕީއެޗްޑީއަށް ކިޔަވަން އެންމެ ފުރަތަމަ ފުރުސަތު ހުޅުވާލީ 2016 ވަނަ އަހަރުގެ އޮގަސްޓް 18 ގައެވެ.
ކޮމެންޓު ފޮނުވާ