ބައިނަލްއަގުވާމީ ބޮޑެތި މައްސަލަތަކުގައި ވަކި ފަޅިއެއް ނުނަގައި، ވަކި އަތަކަށް ބުރަނުވެ ރާއްޖެއިން ކުރިއަށް ދާން އިހުތިޔާރުކުރާ މަގަކީ އިނގިރޭސިވިލާތުން ދައްކަމުން އަންނަ ނަމޫނާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އިނގިރޭސިވިލާތުގެ ކޮންޒަވޭޓިވް ނޫސް "ދި ޓެލެގްރާފް" ގައި ރައީސް ލިޔުއްވި ލިޔުމެއްގައި އެމަނިކުފާނު ވިދާޅުވީ، ހާރިޖީ ސިޔާސަތުގައި އިނގިރޭސިވިލާތަކީ ވަކި ފަޅިއެއް ނުނެގުމުގެ އެންމެ ވަރުގަދަ ނަމޫނާ ކަމަށެވެ. އެމެރިކާއާއި ޔޫރަޕުގެ މެދުގައި ބެލެންސް ކުރުމުގައި އިނގިރޭސިވިލާތުން ދައްކަމުންދާ ނަމޫނާއަށް ތައުރީފު ކުރައްވަމުން ރައީސް ވިދާޅުވީ، ރާއްޖެއިން ވެސް އިހުތިޔާރުކުރާ މަގަކީ އެއީ ކަމަށެވެ.
މާލޭގައި ޗައިނާއިން އެހީތެރިވެގެން ބިނާކުރި ބުރިޖާއި ހައިވޭއާއި، އިންޑިޔާގެ އެހީގައި ތަރައްގީ ކުރަމުންދާ ގްރޭޓަރ މާލެ ކަނެކްޓިވިޓީ ޕްރޮޖެކްޓަށް އިޝާރާތް ކުރައްވަމުން ރައީސް ވިދާޅުވީ، މިއީ 21 ވަނަ ގަރުނުގެ އެންމެ ވާދަވެރި ބޮޑު ދެ ބާރުގެ މަސައްކަތްތަކެއް ނަމަވެސް ދިވެހިންނަށްޓަކައި ހައިޓެކް ރާއްޖެއެއް ތަރައްގީ ކުރުމުގެ ހެއްކެއް ކަމަށެވެ.
ރައީސް ވިދާޅުވީ، ޗައިނާއަކީ އިތުބާރުކުރެވޭ ތަރައްގީގެ ބައިވެރިޔާކަމަށާއި، އިންޑިޔާއަކީ އެންމެ ގާތް އެކުވެރިޔާކަމަށާއި، އިނގިރޭސިވިލާތަކީ ތަބީއީ ބައިވެރިޔާކަމަށެވެ. މި ބޮޑު ބާރުތަކާއެކު މުއާމަލާތް ކުރިނަމަވެސް، ބައިނަލްއަގުވާމީ ބޮޑެތި މައްސަލަތަކުގައި ވަކި ފަޅިއެއް ނުނަގައި ހަރަކާތްތެރިވުމުގެ އިހުތިޔާރު ރާއްޖެއަށް އޮންނާނެ ކަމަށް އެމަނިކުފާނު ވިދާޅުވިއެވެ.
އިނގިރޭސިވިލާތާއެކު ރާއްޖޭގެ އިގުތިސާދީ ގުޅުން ފުޅާވަމުންދާ ކަން ފާހަގަކުރައްވަމުން ރައީސް ވިދާޅުވީ، ޓޫރިޒަމްގެ ބޭރުން ޑިޖިޓަލް އިގުތިސާދާއި، ކްރިއޭޓިވް އިންޑަސްޓްރީ، އިއާދަކުރަނަވި ހަކަތަ އަދި މަސްވެރިކަން ފަދަ ދާއިރާތަކުން އިނގިރޭސި ވިޔަފާރިތަކަށް ބައިވެރިވުމުގެ ވަރަށް ބޮޑު ފުރުސަތުތަކެއް ރާއްޖޭގައި އެބަހުރި ކަމަށެވެ.
ކޮމެންޓު ފޮނުވާ