މާލޭގައި މަސްތުވާތަކެއްޗާއެކު ހަތަރު މީހުން ހައްޔަރު ކޮށްފި

ކައުންޓަރ ނާކޮޓިކްސް އިންޓެލިޖެންސަށް ލިބުނު މައުލޫމާތުގެ މައްޗަށް ބިނާކޮށް މި ޑިސެމްބަރު 22 ވަނަ ދުވަހު ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި މާލޭގައި ހަތަރު މީހުން ހައްޔަރުކޮށްފިއެވެ.

މަސްތުވާތަކެތި ބޭނުންކޮށް ގެންގުޅެ ވިޔަފާރިކުރާކަމަށް ތުހުމަތުކުރެވޭ މި މީހުންނަކީ އއ. މާޅޮހުން 27 އަހަރުގެ އަލީ ސައިފާއި 28 އަހަރުގެ އަޙްމަދު ޝާމިލް، ލ. ގަންމަތިން 30 އަހަރުގެ އަޙްމަދު ނިޘާމް އަދި ސ. ހިތަދޫން 45 އަހަރުގެ ޙުސައިންދީދީއެވެ. އޮޕަރޭޝަންގައި އެ މީހުން ބަލައިފާސްކުރިއިރު މަސްތުވާތަކެތި ކަމަށް ބެލެވޭ 5.23 ގުރާމް އަދި ކުށްމަގުން ހޯދާފައިވާކަމަށް ތުހުމަތުކުރެވޭ 10،000 ރުފިޔާއަށްވުރެ ގިނަ ފައިސާ ފެނިފައިވެއެވެ.

މި މައްސަލައިގައި އަޙްމަދު ނިޘާމް ހަތް ދުވަހަށް އަދި ބާކީތިބި ތިން މީހުން ފަސް ދުވަހަށް ބަންދުކުރުމަށް ކޯޓުން އަމުރުކޮށްފައިވާއިރު، މި މައްސަލަ ފުލުހުން ތަހުގީގުކުރަމުންދެއެވެ.