ސުޕްރީމް ކޯޓުގެ ފަނޑިޔާރުކަމުން ކުއްލި ގޮތަކަށް ވަކިކުރި ޑރ. އަޒްމިރަލްދާ ޒާހިރާއި މަހާޒް އަލީ ޒާހިރުގެ ތަހުގީގު ބަޔާންތައް ޖުޑިޝަލް ސާވިސް ކޮމިޝަނުން އެންޓި ކޮރަޕްޝަން ކޮމިޝަނަށް ފޮނުވައިފިއެވެ. މިކަން ހިނގީ ދެ ފަނޑިޔާރުން މަގާމުން ވަކިކުރިތާ ހަ މަސް ފަހުންނެވެ.
މިދިޔަ ފެބްރުއަރީ 26 ވަނަ ދުވަހު އޭސީސީން ޖިނާއީ މައްސަލަތަކެއް ބަލަމުންދާ ކަމަށް ބުނެ، ޖޭއެސްސީން އަޒްމިރަލްދާއާއި މަހާޒްގެ އިތުރުން ހުސްނުއްސުއޫދު ސަސްޕެންޑުކުރިއެވެ. އޭގެ ފަހުން ސުއޫދު އިސްތިއުފާ ދެއްވިއިރު، ދެން ހުރި ދެ ބޭފުޅުން ވަކިކުރަން މެއި މަހުން ޖޭއެސްސީން ނިންމައި، މެއި 14 ވަނަ ދުވަހު މަޖިލީހުން އެ ދެ ބޭފުޅުން ވަކިކުރިއެވެ.
ފަނޑިޔާރުން ސަސްޕެންޑުކުރީ މަޖިލިސް މެންބަރުން ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ދެކޮޅަށް ސުޕްރީމް ކޯޓަށް ހުށަހެޅި މައްސަލަ ބަލަން ނިންމި ވަގުތެއްގައެވެ. އެއީ ސަރުކާރުގެ މަސްލަހަތު އޮތް ކަމަކަށްވުމުން، ދެ ކޮމިޝަނާއި ސަރުކާރަށް ތުހުމަތުތަކާއި ފާޑުކިޔުން އަމާޒުވިއެވެ.
މައުލޫމާތު ލިބިފައިވާ ގޮތުގައި، އޭސީސީން ތަހުގީގު ބަޔާންތައް ހޯދުމަށް އެދުމުން ޖޭއެސްސީގެ ބައެއް މެންބަރުންގެ މެދުގައި ޚިޔާލު ތަފާތުވިއެވެ. ބައެއް މެންބަރުން ވިދާޅުވީ، އޭސީސީގެ އެންގުމަކަށް ފަނޑިޔާރުންގެ މައްސަލަ ބަލަން ފެށިފަހުން، މާ ފަހުން އެ ބަޔާންތައް ފޮނުވަން ޖެހޭ ގާނޫނީ ސަބަބެއް ނެތް ކަމަށެވެ. ނަމަވެސް ބަޔާންތައް ވަނީ އޭސީސީއަށް ފޮނުވާފައެވެ.
ފަނޑިޔާރުން ވަކިކުރީ އޭސީސީން މައްސަލަތަކެއް ބަލަމުންދާ ކަމަށް ބުނެފައި ވަނިކޮށް، މިހާތަނަށް އެއިން ފަނޑިޔާރަކާ އޭސީސީން ސުވާލެއް ކޮށްފައެއް ނުވެއެވެ. މީގެ ކުރިން އަޒްމިރަލްދާ ތުހުމަތު ކުރެއްވީ، އޭސީސީން ޖޭއެސްސީއަށް ސިޓީ ފޮނުވީ ތަހުގީގެއް ނުފަށަނީސް އޭސީސީގެ ރައީސް އާދަމް ޝާމިލްގެ މަގާމު ދިފާއުކުރުމުގެ ބޭނުމުގައި ކަމަށެވެ.
ކޮމެންޓު ފޮނުވާ