އއ.ތޮއްޑޫ ލޯކަލް އޮތޯރިޓީ ކުންފުނި އުފެދިތާ އަހަރެއް ފަހުވެސް ކައުންސިލް އިދާރާގެ އެހީގެ މައްޗަށް ބަރޯސާވުމުގެ ބަދަލުގައި ކުންފުންޏަށް ލިބޭ އާމްދަނީއަކުން ކުންފުނި ހިންގޭނެ ނިޒާމެއް ގާއިމްކޮށްފައި ނުވާކަން އޮޑިޓަރ ޖެނެރަލްގެ އޮފީހުން ހާމަކުރައްވައިފިއެވެ.
2023 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވަނީ ކުންފުނީގެ މާލީބަޔާން ތައްޔާރުނުކުރުމުން މާލީ ހާލަތު ވަޒަންކުރެވޭނެ އަސާސެއް ނެތްކަމަށާއި ކުންފުނީގެ ހިންގުން ވަރަށް ބޮޑަށް ބޮއްސުންލާފައިވާކަމަށެވެ. 2023 އިން 2024 އަށް ކުންފުންޏަށް ލިބުނު 5.3 މިލިއަން ރުފިޔާގެ ތެރެއިން 2 ލައްކަ ރުފިޔާއަކީ ކައުންސިލް އިދާރާއިން ލިބިފައިވާ ފައިސާކަމަށް އޮޑިޓް ރިޕޯޓްގައި ވެއެވެ.
ކުންފުނީގެ ހިންގުމުގައި ވަނީ ވަރަށް ގިނަ މައްސަލަތަކެއް ފެންނަން ހުރިކަމަށް އޮޑިޓަރ ޖެނެރަލް ފާހަގަކުރައްވައިފައިވެއެވެ. ވިޔަފާރިކުރަން ދެވޭވަރަށްވުރެ ކުޑަ މާޖިންއެއް ލައިގެން ތަކެތި ވިއްކުމާއި، އުސޫލެއް ނެތި މުއައްޒަފުންގެ މަސްލަހަތު އޮންނަ ތަންތަނަށް ކްރެޑިޓަށް ތަކެތި ދޫކުރުމާއި، ކޮންސްޓްރަކްޝަން މެޓީރިއަލްސް މަގުމަތީ ބެހެއްޓުން އޭގެ ތެރޭގައި ހިމެނެއެވެ. މީގެ އިތުރުން ގަންނަން އޮތް ވަކި އަދަދަކަށް ޕިކަޕެއް ކުއްޔަށް ނެގުމަށް ހަރަދުކޮށްފައިވާކަމާއި، ކޮންސަލްޓެންސީ އެއްބަސްވުމުގެ ދަށުން ހިދުމަތް ލިބުނުކަން ލިޔުމުން އެނގެން ނެތިއްސުރެ ފައިސާ ހަރަދުކޮށްފައިވާކަން ފާހަގަކުރެވިފައިވެއެވެ.
އޮޑިޓް ރިޕޯޓްގައި އިތުރަށް ފާހަގަކޮށްފައިވަނީ ކުންފުނީގެ ބޯޑު މެމްބަރުން ކުންފުނީގެ ދުވަހުން ދުވަހަށް ކުރަންޖެހޭ މަސައްކަތްތައް ކުރާގޮތަށް ބޯޑުން ނިންމައި މުސާރަ ނަގަމުންދިޔަކަމެވެ. ލޯކަލް އޮތޯރިޓީ ކުންފުންޏާބެހޭ ގަވާއިދުގައި މެނޭޖިންގ ޑިރެކްޓަރު ފިޔަވައި އެހެން ޑިރެކްޓަރުން ކުންފުނީގެ ދުވަހުން ދުވަހަށް ކުރަންޖެހޭ މަސައްކަތްތައް ކުރުމަށް މަނާކުރެއެވެ.
ކޮމެންޓު ފޮނުވާ