ފުލުހުންގެ "އޮޕަރޭޝަން އަލިމަގު" ގެ ދަށުން އައްޑޫ ސިޓީގައި ހިންގި ހާއްސަ އޮޕަރޭޝަނެއްގައި މަސްތުވާތަކެތީގެ ވިޔަފާރިކުރާ ނެޓްވޯކެއްގެ އިސް ފަސް މީހަކު ހައްޔަރުކޮށް، އެމީހުންގެ ވަނަވަރު އާންމުކޮށްފި އެވެ.
މި މަހުގެ ތިންވަނަ ދުވަހުގެ ރޭ ހިންގި މި އޮޕަރޭޝަނުގައި ހައްޔަރުކޮށްފައި ވަނީ ހިތަދޫއަށް ނިސްބަތްވާ އުމުރުން 23 އަހަރާއި 43 އަހަރާ ދެމެދުގެ ފަސް ފިރިހެނުންނެވެ. ފުލުހުން ހާމަކުރި ގޮތުގައި މި ނެޓްވޯކުން 2017 ވަނަ އަހަރުން ފެށިގެން މަސްތުވާތަކެތީގެ ވިޔަފާރި ކުރަމުން އައިސްފައިވާއިރު، ފާއިތުވި ފަސް އަހަރު ތެރޭގައި އެ ނެޓްވޯކުގެ އިސް ހަތަރު މީހެއްގެ އެކައުންޓް ތެރެއިން 19 މިލިއަން ރުފިޔާއަށް ވުރެ ގިނަ ފައިސާ ދައުރުވެފައިވެ އެވެ.
ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ތިން މީހަކަށް 30 ދުވަހުގެ ބަންދު ދީފައިވާއިރު ދެ މީހަކަށް ފަސް ދުވަހުގެ ބަންދު ދީފައިވެ އެވެ. މަސްތުވާތަކެތި ޓްރެފިކް ކުރުމާއި މަނީ ލޯންޑާ ކުރުމުގެ ތުހުމަތުގައި ކުރެވޭ މި ތަހުގީގު ފެށީ މި އަހަރުގެ މާޗް މަހުގަ އެވެ.
ކޮމެންޓު ފޮނުވާ