ކެރަމް ވޯލްޑް ކަޕްގެ އަންހެނުންގެ ޓީމް އިވެންޓުން ރާއްޖެ ސެމީއަށް

ބާސެލޯ ނަސަންދުރާގައި މިހާރު ކުރިއަށްދާ ހަތްވަނަ ކެރަމް ވޯލްޑް ކަޕްގެ އަންހެނުންގެ ޓީމް އިވެންޓްގެ ގްރޫޕް ސްޓޭޖް ނިންމާލައި ރާއްޖޭގެ އަންހެން ޓީމު ސެމީ ފައިނަލަށް ދަތުރުކޮށްފިއެވެ.

ގްރޫޕް ސްޓޭޖުގެ ފަހު މެޗުގައި ރާއްޖެއިން ސްރީ ލަންކާ ބަލިކުރީ 2-1 ގޭމުންނެވެ. ޑަބަލްސް މެޗު ލަންކާ ކާމިޔާބުކުރި ނަމަވެސް، ސިންގަލްސް ދެ މެޗުން ރާއްޖެ މޮޅުވެ، ޖުމްލަ ނަތީޖާ ރާއްޖެއާ އެއްކޮޅަށް އެނބުރުނީއެވެ. ސިންގަލްސް ފުރަތަމަ މެޗުގައި އައިމިނަތު ވިދާދް ސީދާ ދެ ސެޓުން މޮޅުވިއިރު، ދެވަނަ މެޗުގައި އައިޝަތު ފައިނާޒް ފޯރިގަދަ ކުޅުމަކަށްފަހު 2-1 ސެޓުން ކާމިޔާބު ހޯދިއެވެ.

މި މުބާރާތުގައި ދުނިޔޭގެ 17 އަށްވުރެ ގިނަ ގައުމުން 150 އަށްވުރެ ގިނަ އެތުލީޓުން ވާދަކުރެއެވެ. ސެމީ ފައިނަލުގައި ރާއްޖޭގެ އަންހެން ޓީމު ނުކުންނާނީ އެމެރިކާއާ ދެކޮޅަށެވެ. މިދިޔަ އަހަރު އެމެރިކާގައި ބޭއްވި ވޯލްޑް ކަޕުން ރާއްޖެ ވަނީ އަންހެން އަދި ފިރިހެން ޓީމް އިވެންޓުން ބްރޯންޒް މެޑެލް ހޯދާފައެވެ.