އެސިސްޓެންޓް ކަމިޝަނާ އޮފް ޕޮލިސްގެ މަޤާމުގައި ހުންނެވި ޑރ.އަބްދުﷲ ފައިރޫޝް ފުލުހުންގެ ވަޒީފާއިން ރިޓަޔާ ކުރެއްވި މައްސަލަ ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ (241) ކޮމިޓީއަށް ހުށަހަޅުއްވައިފިއެވެ.
ފައިރޫޝް ފުލުހުންގެ ވަޒީފާއިން ޝަރަފްވެރި ކަމާއިއެކު ރިޓަޔާ ކުރައްވާފައިވަނީ މިމަހުގެ 2 ވަނަ ދުވަހުގައެވެ. ފައިރޫޝް ރިޓަޔާ ކުރެއްވުމާއި ގުޅިގެން މަޖިލިސް ރައީސް ވަނީ ފުލުހުންގެ އާ ޤާނޫނު އެކުލަވާލައި ތަސްދީޤު ކުރައްވާފައި ވަނިކޮށް، ޤާނޫނަށް އަމަލު ކުރައްވަން ނުފައްޓަނީވެސް އިތިއުފާ ނުދެއްވޭނެކަމަށް ވިދާޅުވެ މައްސަލަ 241 ކޮމިޓީއަށް ހުށަހަޅުއްވާފައެވެ. ރައީސް ނަޝީދު ޤަބޫލުފުޅު ކުރައްވާ ގޮތުގައި ފުލުހުންގެ ވަޒީފާއިން ދެން ރިޓަޔާ ކުރައްވާނަމަ ރިޓަޔާ ކުރައްވަން ޖެހޭނީ އާ ޤާނޫނުގެ ދަށުންނެވެ.
ފުލުހުންގެ އާ ޤާނޫނުގެ 112 ވަނަ މާއްދާގައި ބުނެފައިވަނީ:
ފުލުހުންގެ ވަޒީފާއިން ވަކިކުރާ މީހުންނާއި، ފުލުހެއްގެ މަޤާމުގައިހުރެ ކުރިކަމެއްގެ ސަބަބުން އޭނާއާމެދު އެޅިދާނެ ތައުދީބީ ފިޔަވަޅަކުން ސަލާމަތްވުމަށްޓަކައި ފުލުހުންގެ ޚިދުމަތުން ވަކިވާ މީހުން ފިޔަވައި، ފުލުހުންގެ ވަޒީފާއިން އަމިއްލަ އިޚްތިޔާރުގައި، އެއްވެސް ތައުދީބީ މައްސަލައެއް އުފުލިފައިނެތް ޙާލަތުގައި، އަދި އެފަދަ މައްސަލައެއް އުފުލުމުގެ ޙާލަތުވެސް އުފެދިފައިނެތި، ވަކިވާ ކޮންމެ މީހަކީ، ޝަރަފުވެރިކަމާއެކު ފުލުހުންގެ ވަޒީފާއިން ވަކިވާ މީހެއް ކަމަށެވެ.
ފައިރޫޝްވަނީ ފުލުހުންގެ ވަޒީފާއިން ރިޓަޔާ ކުރެއްވުމަށް މީގެ 6 މަސް ކުރިން ސިޓީ ހުށަހަޅާފައެވެ. ފުލުހުންގެ ވަޒީފާގައި 20 އަހަރު ޚިދުމަތް ކުރެއްވުމަށްވުމަށްފަހު ރިޓަޔާ ކުރައްވާފައިވާ ފައިރޫޝް މިހާރު ވަނީ އޮސްޓްރޭލިއާ އަށް ވަޑައިގެންފައެވެ. އަދި އޭނާ ގެންދަވަނީ އޮސްޓްރޭލިއާގެ ޔުނިވާސިޓީއެއްގައި ލެކްޗަރާއެއްގެ ވަޒީފާ އަދާ ކުރައްވަމުންނެވެ.
ފުލުހުންގެ ޚިދުމަތުން ފައިރޫޝް ވަކިވުމާއި ގުޅިގެން އޭނާގެ ޚިދުމަތުގެ އަގު ވަޒަންކޮށް ރައީސް ޞާލިހުވެސް ވަނީ އޭނާއަށް ޝުކުރު އަދާކުރައްވައި އަދިވެސް ޚިދުމަތުގައި ދެމި ހުންނެވުމަށް އެދިވަޑައިގެންފައެވެ. ރައީސް ޞާލިހު ފައިރޫޝްއަށް ޝުކުރު އަދާކުރެއްވި ނަމަވެސް އެމްޑީޕީގެ ބައެއް ބޭފުޅުންދަނީ ފައިރޫޝްއަކީ ބަޣާވާތުގެ އިސް ބައިވެރިކަމެއްކަމަށްބުނެ އޭނާއަށް ފާޑުކިޔަމުންނެވެ.
ފުލުހުންގެ ޚިދުމަތުން ޑރ. ފައިރޫޒް ރިޓަޔަރކުރެއްވިއިރު އޭނާ ހުންނެވީ ފުލުހުންގެ ހެޑް އޮފް ރިސޯސް މެނޭޖްމެންޓްގެ މަގާމުގައެވެ. މިއީ ފުލުހުންގެ ފައިނޭންސާއި އިންސާނީ ވަސީލަތްތަކާއި އިންޖިނިއަރިން އަދި މެކޭނިކަލް ސާވިސް ހިމެނޭ ޑިޕާޓްމެންޓެވެ. ފައިރޫޝްއަކީ އޮސްޓްރޭލިއާގެ މެކުއަރީ ޔުނިވާސިޓީން ލޯ އެންފޯސްމަންޓް އިންޓެލިޖެންސްއިން ޕީއެޗްޑީ ހާސިލުކުރައްވާފައިވާ ބޭފުޅެކެވެ. ފުލުހުންގެ ޚިދުމާއި 1998 ވަނަ އަހަރުގެ އޮކްޓޫބަރުމަހުގެ 12 ވަނަ ދުވަހު ގުޅިވަޑައިގަތް ފައިރޫޝް ވަނީ 20 އަހަރާއި 1 މަސްދުވަސް ހޭދަކުރައްވާފައެވެ.
ފުލުުހުންނަށް ދޭ 9 ކުލައަކާއި 6 މެޑަލް ފައިރޫޝް ހާސިލްކުރައްވާފައިވާއިރު، އޭނާ ވަނީ ރާއްޖެއާއި ރާއްޖެއިން ބޭރުން ތަފާތު އެކި ތަމްރީންތައް ފުރިހަމަކުރައްވާފައެވެ.
