މޫސުމާ ބެހޭ އިދާރާ، މެޓް އޮފީސް އިން ވަނީ ކުރިއަށް އޮތް 24 ގަޑިއިރާއި ދެން އަންނަ ތިން ދުވަހުގެ ތެރޭގައި ވެސް މުޅި ރާއްޖެއަށް ވިއްސާރަ ކުރާނެ ކަމަށް ލަފާކޮށްފަ އެވެ. މެޓް އޮފީހުން ބުނީ އަންނަ ހަފުތާގައި ވިއްސާރަ އަލިކޮށްލާނެ ކަމަށް ބެލެވޭ ކަމަށެވެ.
މި ދުވަސްވަރު ރާއްޖޭގައި ވިއްސާރަ ކުރާނެ ކަމަށް ލަފާކުރެވެނީ އިންޑިއާ އާއި ސްރީލަންކާ ކައިރިން ބަންގާޅު ކަނޑުގައި އުފެދިފައިވާ ކޮޅިގަނޑުގެ ނުސީދާ އަސަރުން ކަމަށް މެޓް އޮފީހުން ބުނެ އެވެ. އެ ކޮޅިގަނޑުގެ ބާރު ގަދަވަމުން ދާއިރު، ކުރިއަށް އޮތް 24 ގަޑިއިރުގެ ތެރޭގައި ތޫފާނަކަށް ބަދަލުވުން އެކަށީގެންވާ ކަމަށް އިންޑިއާގެ މޫސުމާ ބެހޭ އިދާރާއިން ލަފާކޮށްފައިވެ އެވެ. އަދި އެ ތޫފާން އަރާނެ ކަމަށް ލަފާކުރަނީ އިންޑިއާގެ ޓެމިލް ނާޑު އާއި ޕުންޑުޗަރީގެ ސަރަހައްދަށް ކަމަށް ވެސް އެ އިދާރާއިން ބުނެފައިވެ އެވެ.
މެޓް އޮފީހުން މިއަދު ވަނީ ބޯކޮށް ވާރޭ ވެހޭނެ ކަމަށް ލަފާކޮށް މެންދުރު 6:30 އާ ހަމައަށް ޅ. އަތޮޅުން ފެށިގެން އދ. އަތޮޅަށް ޔެލޯ އެލާޓް ނެރެފަ އެވެ. ވިލާގަނޑުގައި 40 މޭލަށް ވައިގަދަވުން އެކަށީގެންވާ ކަމަށް ވެސް އިންޒާރު ދީފައިވެ އެވެ. ތިން ދުވަހުގެ ފަހުން އުތުރާއި ދެކުނު ވިއްސާރަ މަޑުކޮށްލާނެ ނަމަވެސް، މެދު ރާއްޖެ ތެރޭގައި ވިއްސާރަ މަޑުކޮށްލާނީ ފަސް ދުވަސް ފަހުންކަމަށް ލަފާ ކޮށްފައި ވެއެވެ.
ދިވެހި ނަކަތް ކަލަންޑަރުގައިވާ ގޮތުން ހުޅަނގު މޫސުމުގެ އެންމެ ފަހު ނަކަތް ކަމަށްވާ ދޮށަ ނަކަތް ނިމޭނީ އަންނަ މަހުގެ ނުވަވަނަ ދުވަހު އެވެ. މިހާރު ހިނގަމުން އަންނަ ނޮރަ ނަކަތުގައި އާންމުކޮށް މޫސުން ރަނގަޅުވިޔަސް، ދޭތެރެ ދޭތެރެއިން ވިއްސާރަކޮށް ވިލާގަނޑުގައި ގަދަވާނެ އެވެ.
ކޮމެންޓު ފޮނުވާ