ނިއުޔޯކް ސިޓީގެ މޭޔަރުކަމަށް ހޮވިފައިވާ ޒޮހޮރާން މަމްދާނީ އާއި އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ބޭއްވެވި ބައްދަލުވުމަކަށްފަހު، ކުރިން އޮތް ސިޔާސީ ތަފާތުތައް އެއްކައިރިކޮށް އެކީގައި މަސައްކަތް ކުރުމަށް އެއްބަސް ވެއްޖެއެވެ.
ދެބޭފުޅުން ވެސް އެއްބޭފުޅަކު އަނެއްބޭފުޅަކަށް ތަޢުރީފްކުރައްވައި، ނިއުޔޯކްގައި ދިރިއުޅުމުގެ ޚަރަދު ހެޔޮކުރުމާއި، ހައުސިންގ މަޝްރޫޢުތައް ހިންގުމާއި، އާންމު ރައްކާތެރިކަން ކަށަވަރުކުރުމަށް އެކުގައި މަސައްކަތްކުރާނެކަން ހާމަކުރެއްވިއެވެ. އޯވަލް އޮފީހުގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ މަމްދާނީއާ އެކު މުހިންމު އަދި ނަތީޖާ ނެރެވޭފަދަ ބައްދަލުވުމެއް ބޭއްވިފައިވާ ކަމަށާއި، މަމްދާނީ މޭޔަރަކަށް ހޮވުންވީ "ފުރިހަމަ" ކާމިޔާބީއެއް ކަމަށެވެ.
މީގެ ކުރިން ކެމްޕޭނުގެ ތެރޭގައި މަމްދާނީއަށް "ކޮމިއުނިސްޓެއް" ކަމަށް ގޮވާލައްވައި ފެޑެރަލް ފަންޑު ނުދެއްވާނެކަމުގެ އިންޒާރުދީފައިވާ ޓްރަމްޕް، މިހާރު ވިދާޅުވީ އޭނާގެ ބައެއް ޚިޔާލުތަކަށް ބަދަލު އައިސްފައިވާ ކަމަށެވެ. މަމްދާނީ ވިދާޅުވީ، ގޭބިސީގެ ކުއްޔާއި، ކާބޯތަކެތީގެ އަގުތަކާއި، ކަރަންޓާއި ފެންފަދަ ޚިދުމަތްތަކުގެ އަގުތަކާ ބެހޭގޮތުން ރައީސާ އެކު މަޝްވަރާކޮށް، ނިއުޔޯކްގެ ރައްޔިތުންނަށް ދިރިއުޅުމުގެ ޚަރަދު ހެޔޮކޮށްދިނުމަށް އެކުގައި މަސައްކަތް ކުރުމަށް އުންމީދު ކުރައްވާ ކަމަށެވެ.
ޓްރަމްޕް ވިދާޅުވީ މަމްދާނީ "ވަރަށް ރަނގަޅު މަސައްކަތެއް" ކުރައްވާނެ ކަމަށް އިތުބާރުކުރައްވާ ކަމަށާއި، "ބައެއް ކޮންޒަވޭޓިވް މީހުން ހައިރާންކުރާނެ" ކަމަށްވެސް ވިދާޅުވިއެވެ. މި ބައްދަލުވުމަކީ، ސިޔާސީ ގޮތުން ތަފާތު ޚިޔާލުތަކެއް ހުރި ދެ ބޭފުޅުން، އާންމު ރައްޔިތުންނަށް ފައިދާ ކުރާނެ ކަންކަމުގައި އެކުގައި މަސައްކަތް ކުރުމުގެ ފުރުސަތު ހުޅުވިގެންދިޔަ މުހިންމު ބައްދަލުވުމެއްކަމަށް ބަލަހައްޓަމުންދެއެވެ.
ކޮމެންޓު ފޮނުވާ