ގޫގުލް އިން "ދިވަރު" ކޭބަލް ޕްރޮޖެކްޓާއެކު ރާއްޖެއަށް އިންޓަނެޓު ސަބްމެރިން ކޭބަލް އަޅައި ރާއްޖެ ޑިޖިޓަލް ހަބަކަށް ހެދުމަށް އޫރިދޫ މޯލްޑީވްސް އާއެކު ތައްޔާރުވެއްޖެއެވެ. ކޭބަލް އިންވެސްޓްމަންޓްގެ އިތުރުން ގޫގުލް އިން މި ސަރަހައްދަށް އާ ދެ ކަނެކްޓިވިޓީ ހަބެއް އުފެއްދުމަށް އިންވެސްޓް ކުރާނެއެވެ.
ގޫގުލް އިން އައްޑޫ ސިޓީގެ ހިތަދޫގައި ގާއިމުކުރަން ނިންމާފައިވާ މި ބައިނަލްއަގުވާމީ ސަބްމެރިން ކޭބަލް ލޭންޑިން ސްޓޭޝަންއާއި ނެޓްވޯކް ފެސިލިޓީ ގާއިމްކުރުމަކީ އެމެރިކާގެ ނިއުޔޯކްގައި 2024 ވަނަ އަހަރުގެ ސެޕްޓެމްބަރު މަހު ރައީސް ޑރ. މުހައްމަދު މުއިއްޒު ގޫގުލްގެ އިސްވެރިންނާ ބައްދަލުކުރައްވައި ކުރެއްވި މަޝްވަރާތަކަށްފަހު ފެށިފައިވާ މަޝްރޫއެކެވެ.
އުރީދޫ މޯލްޑިވްސްގެ ސީއީއޯ އަދި އެމްޑީ ޚާލިދު އަލް ހައްމާދީ ވިދާޅުވީ، ގޫގުލްއާ ގުޅިގެން ރާއްޖޭގައި އާ ކަނެކްޓިވިޓީ ހަބެއް ގާއިމްކުރުމަކީ ޑިޖިޓަލް އިންފްރާސްޓްރަކްޗާ ކުރިއެރުވުމަށާއި ޑިޖިޓަލް ޓްރާންސްފޯމޭޝަންގެ އާ މަރުހަލާ ކުރިއަށް ގެންދިއުމަށް އެޅޭ މުހިންމު ފިޔަވަޅެއް ކަމަށެވެ. މި ކުރިއެރުންގެ ސަބަބުން ވިޔަފާރިތަކަށް އާ ފުރުސަތުތައް ފަހިވެ، ސްމާޓް އޮޕަރޭޝަންސްއާއި ކަސްޓަމަރުންގެ ތަޖުރިބާ ރަނގަޅުވެގެންދާނެ ކަމަށް ވެސް ޚާލިދު ވިދާޅުވިއެވެ.
ރާއްޖެ ގުދުރަތީ ގޮތުން ކަނެކްޓިވިޓީ ހަބެއްގެ ގޮތުގައި އޮތުމުގެ ސަބަބުން އެފްރިކާ، މެދުއިރުމަތި، ދެކުނު އޭޝިއާ އަދި އޯޝަނިއާ ފަދަ ގައުމުތަކުގެ ޑިޖިޓަލް ކަނެކްޓިވިޓީ ހަރުދަނާ ކުރުމަށް މަގުފަހިވެގެންދާނެއެވެ. އިކޮނޮމިކް މިނިސްޓްރީން ބުނީ މި އިންވެސްޓްމަންޓަކީ ރައީސުލްޖުމްހޫރިއްޔާގެ ގައުމީ ތަރައްގީގެ އެޖެންޑާއާ އެއްގޮތްވާ ގޮތުގެ މަތިން ޑިޖިޓަލް އިންގިލާބީ ބަދަލުތައް ގެނުވައި އުމްރާނީ ތަރައްގީއަށް މަގުފަހިވެގެންދާނެ އިންވެސްޓްމެންޓެއް ކަމަށެވެ. މީގެ އިތުރުން ކްލައުޑް ސާވިސަސް، ފިންޓެކް، ޑިޖިޓަލް ކޮންޓެންޓް އަދި ޓެކްނޮލޮޖީ ސްޓާޓްއަޕްސް ފަދަ އާ ދާއިރާތައް ތަރައްގީކުރުމަށް ދިވެހިރާއްޖޭގައި ހުރި ފުރުސަތުތައް ވެސް މިކަމުން ހާމަވެގެންދާނެއެވެ.
ކޮމެންޓު ފޮނުވާ