ރާއްޖެއަށް ކަނޑުމަގުން މަސްތުވާތަކެތި އެތެރެކުރާކަމަށް އިންޓެލިޖެންސަށް ލިބުނު މައުލޫމާތަކާ ގުޅިގެން، ގއ. އަދި ގދ. އަތޮޅުގައި ފުލުހުން ހާއްސަ އޮޕަރޭޝަނެއް ކުރިއަށް ގެންގޮސް 16 މީހަކު ހައްޔަރުކޮށް 12 ކިލޯގެ މަސްތުވާތަކެތި ހޯދައިފިއެވެ.
މި މަހުގެ 2 އިން 13 އަށް ކުރިއަށް ދިޔަ މި އޮޕަރޭޝަންގައި ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް އަދި ސައުތު ޕޮލިސް ގުޅިގެން މަސައްކަތްކޮށްފައިވެއެވެ. ހައްޔަރުކޮށްފައިވަނީ ގއ. މާމެންދޫއިން 7 ފިރިހެނުންނާއި އަންހެނަކާއި ގދ. ވާދޫއިން 5 ފިރިހެނުންނާއި މާލެއިން 3 ފިރިހެނުންނެވެ. އެމީހުންގެ ތެރޭގައި 27 އަހަރާއި 45 އަހަރާ ދެމެދުގެ ފިރިހެނުންނާއި 24 އަހަރުގެ އަންހެނެއް ހިމެނެއެވެ.
ކޯޓުން މި މައްސަލައާ ގުޅިގެން 3 މީހަކަށް 30 ދުވަސް، 6 މީހަކަށް 15 ދުވަސް، އެކަކަށް 18 ދުވަސް އަދި އަނެކަކަށް 10 ދުވަހުގެ ބަންދުގެ މުއްދަތު ދީފައިވެއެވެ. އޮޕަރޭޝަންގައި 18 ގެއާއި ގެސްޓް ހައުސްއަކާއި އޮފީހަކާއި ފަޅު ރަށަކާއި 2 ހުސްބިން އަދި 2 ކާރާއި 5 ސައިކަލް ބަލާފައިވާކަމަށް ފުލުހުން ބުނެއެވެ. މި މައްސަލަ އިތުރަށް ތަހުގީގު ކުރަމުން އަންނަކަމަށްވެސް ފުލުހުން ވަނީ ހާމަކޮށްފައެވެ.
ކޮމެންޓު ފޮނުވާ