ހުވަދުއަތޮޅާއި ފުވައްމުލަކު ސިޓީއާއި އައްޑޫސިޓީ ހިމެނޭ ސައުތު ޕޮލިސް ޑިވިޝަން ސަރަހައްދުގައި މަސްތުވާތަކެތީގެ ވިޔަފާރި ކުރަމުންދާ 12 ނެޓްވޯކެއް ފުލުހުންގެ ތަހުޤީޤުން ދެނެގަނެވިފައިވާކަން އެ އިދާރާއިން ހާމަކޮށްފިއެވެ.
މިދިޔަ އަހަރު ޖެނުއަރީ މަހު ފުވައްމުލަކު ސިޓީގައި "ވެށި ރައްކާ" ނަމުގައި ފުލުހުން ކުރިއަށް ގެންދިޔަ ޚާއްސަ އޮޕަރޭޝަނުން މަސްތުވާތަކެތީގެ ދެ ބޮޑު ނެޓްވޯކަކަށް ހަމަލާދީ ވިޔަފާރިވެރިންނާއި އެކަމުގެ އަޑީގައި ތިބި ފަރާތްތައް ހައްޔަރުކުރުމަށްފަހު މިހާރު އެ އޮޕަރޭޝަން ދެކުނު ރީޖަންގެ އެހެން އަތޮޅުތަކަށްވެސް ފުޅާކޮށްފައިވާކަން ސައުތު ރީޖަން ކޮމާންޑަރ އަޙްމަދު ޝަމީމް ހާމަކުރެއްވިއެވެ.
ފުވައްމުލަކުގައި ހިންގި އޮޕަރޭޝަންގެ ތެރެއިން 112 ފަރާތެއްގެ މައްސަލަ ޕީޖީ އޮފީހަށް ފޮނުވައި، 42 ފަރާތެއްގެ ބޭންކް ސްޓޭޓްމެންޓް ބަލައި 22 ފަރާތެއްގެ ބޭންކް އެކައުންޓް ފްރީޒްކޮށްފައިވާކަން ފުލުހުން ހާމަކުރިއެވެ. އެގޮތުން ފުވައްމުލަކު ދޫޑިގަން ހަސަން ޢާޒިމާއި އަޙްމަދު ނިއުޝާދުގެ މައްޗަށް މަސްތުވާތަކެތީގެ ވިޔަފާރި ހިންގި ތުހުމަތުގައި ޕީޖީ އޮފީހުން ކްރިމިނަލް ކޯޓަށް ދަޢުވާކޮށްފައިވެއެވެ.
އޮޕަރޭޝަނުގެ ދެވަނަ ފިޔަވަހި ފުވައްމުލަކުގައި މިހާރު ކުރިއަށްދާއިރު، ފޮރުވައިގެން މަސްތުވާތަކެތި ވިއްކާ ފަރާތްތައް އިންސާފުގެ ކުރިމައްޗަށް ގެނައުމަށް މަސައްކަތް ކުރަމުންދާކަމަށް ޝަމީމް ވިދާޅުވިއެވެ.
ކޮމެންޓު ފޮނުވާ