މިދިޔަ ހުކުރު ދުވަހު ރާއްޖޭގެ ކަނޑުގެ ސަރަހައްދުން ގިނަ އަދަދެއްގެ މަސްތުވާތަކެތި އެކުލެވިގެން އަތުލައިގަތް ސްރީ ލަންކާގެ މަސްބޯޓާ ގުޅޭ ތަހުގީގަށް އެ ގައުމުގެ ހާއްސަ ޓީމެއް ރާއްޖެއަށް އައިސްފައިވާ ކަމަށް ލަންކާގެ ނޫސްތަކުން ބުނެފި އެވެ. ލަންކާގެ ޕޮލިސް ނާކޮޓިކްސް ބިއުރޯ އާއި ސްރީ ލަންކާ ނޭވީގެ މުވައްޒަފުން ހިމެނޭ ޓީމަކީ އެއީ ކަމަށް ރިޕޯޓްތައް ބުނެ އެވެ.
ލަންކާއިން ދިން އިންޓެލިޖެންސް މައުލޫމާތަކަށް ބިނާކޮށް ދިވެހި ސިފައިން ހިންގި އޮޕަރޭޝަނުގައި ބޯޓު ފެނުނީ ރާއްޖޭގެ ކަނޑުގެ ސަރަހައްދުގައި ގާނޫނާ ހިލާފަށް ހަރަކާތްތެރިވެފައި ހުރުމުން ސިފައިންގެ ޑްރޯން ބޭނުންކޮށްގެން ހިންގި ސަވެއިލަންސް އޮޕަރޭޝަނެއްގަ އެވެ. އެ ބޯޓުގައި 300 ކިލޯގެ ހެރޮއިން އާއި ކްރިސްޓަލް މެތު ހުރި ކަމަށް ލަންކާގެ މީޑިއާގައި ބުނާއިރު، އެ ބޯޓުގައި ތިބި ފަސް މީހުންނާއި ބޯޓާއި ތަކެއްޗަކީ ރާއްޖޭގެ ފުލުހުންގެ ބެލުމުގެ ދަށަށް ގެނެސްފައިވާ ތަކެތި ކަމަށް އެމްއެންޑީއެފުން ވަނީ ހާމަކޮށްފަ އެވެ. ނަމަވެސް ފުލުހުންނާއި އެމްއެންޑީއެފުން މިހާތަނަށް އެ ބޯޓުގައި ހުރި މަސްތުވާތަކެތީގެ ރަސްމީ ތަފްސީލެއް ނުހާމަކުރެ އެވެ.
ކޮމެންޓު ފޮނުވާ