ހދ. ހަނިމާދޫ އިންޓަނޭޝަނަލް އެއާޕޯޓް ބޮޑުތިލަދުންމަތީ ސަރަހައްދުގެ އިގްތިސޯދަށް ބޮޑު ބަދަލެއް ގެނެސްދޭނެ ތަނަކަށް ވެގެންދާނެކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ. އެކްސްގައި ކުރެއްވި ޕޯސްޓެއްގައި ސޯލިހު ވިދާޅުވީ އެ ސަރަހައްދުގެ ފަތުރުވެރިކަން ފުޅާކޮށް އިތުރު ވިޔަފާރިތައް ފެށުން މުހިންމު ކަމަށާއި، މިއަދުގެ ސަރުކާރުން އެކަންކަމަށް ސަމާލުކަން ދެއްވާނެކަމަށް އުންމީދުކުރައްވާ ކަމަށެވެ.
އިންޑިއާގެ ކަލްޕަތަރު ޕްރޮޖެކްޓްސްއިން 2022ގައި ތަރައްގީކުރި މި އެއާޕޯޓަކީ އަހަރަކު 1.3 މިލިއަން ފަސިންޖަރުންނަށް ހިދުމަތްދެވޭނެ ޒަމާނީ ވަސީލަތްތަކާއި ހަމަޔަށް "ގޭޓް އޮފް ދަ އާޓް" ޓާމިނަލެއް ހިމެނޭ ތަނެކެވެ. ދިވެހި ފަންނުވެރިންގެ އާޓިސްޓިކް އުފެއްދުންތަކުން ދިވެހި މުއްސަނދި ތާރީހާއި ހުނަރުވެރިކަން ދައްކުވައިދޭ މި ޓާމިނަލަކީ ރާއްޖޭގެ އެންމެ ރީތި ޓާމިނަލްތަކުގެ ތެރޭގައި ހިމެނޭ ތަނަކަށް ވެގެންދާނެއެވެ. އެއާބަސް A320 އާއި ބޯއިންގ 737 އަށް ހިދުމަތްދެވޭ މި އެއާޕޯޓްގެ މަސައްކަތަށް އެހީވެދެއްވީތީ އިންޑިއާގެ ބޮޑުވަޒީރު ނަރިންދުރަ މޯދީއަށާއި އެގައުމުގެ ސަރުކާރަށް ސޯލިހު ވަނީ ޝުކުރު އަދާކުރައްވާފައެވެ.
ކޮމެންޓު ފޮނުވާ