ދިވެހި ސިފައިން ރާއްޖޭގެ ކަނޑުގެ ސަރަހައްދުގައި ގާނޫނާ ޚިލާފަށް ހަރަކާތްތެރިވަމުން ދަނިކޮށް އަތުލައިގަތް ސްރީލަންކާގެ މަސްބޯޓުތައް ފުލުހުންނާ ހަވާލުކޮށްފި އެވެ.
އެމްއެންޑީއެފުން ހާމަކުރި ގޮތުގައި، ރާއްޖޭގެ ސަރަހައްދަށް ގާނޫނާ ޚިލާފަށް ވަދެ އުޅުނު މަސްބޯޓުން ފެނުނު މަސްތުވާ ތަކެތިކަމަށް ޝައްކުކުރެވޭ ގިން އަދަދެއްގެ ތަކެތި ވެސް ފުލުހުންނާ ހަވާލުކޮށްފައި ވާކަމަށެވެ. ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި، ޑްރޯން ބޭނުންކޮށްގެން ހިންގި ސަވައިލެންސްގައި އަތުލައިގަތް އެ ބޯޓުގައި 300 ކިލޯގެ ހެރޮއިން އަދި ކްރިސްޓަލް މެތް ހުރިކަން ހާމަވެފައިވެ އެވެ. އެ ބޯޓުގައި ހަ މަސްވެރިން ތިއްބެވެ. ލަންކާގެ ކަނޑުގެ ސިފައިންގެ އިންޓެލިޖެންސް މައުލޫމާތުގެ މައްޗަށް ބިނާކޮށް އެ ބޯޓު ހުއްޓުވި ކަމަށް ރިޕޯޓުތައް ބުނެ އެވެ.
މީގެ އިތުރުން ރާއްޖޭގެ އިކޮނޮމިކް އެކްސްކްލޫސިވް ޒޯންގައި ގާނޫނާ ޚިލާފަށް ހަރަކާތްތެރިވަމުން ދިޔަ ލަންކާގެ އިތުރު ދެ މަސްބޯޓެއް ވެސް ކޯސްޓްގާޑުގެ ބެލުމުގެ ދަށަށް ގެނެސްފައިވާ ކަމަށް އެމްއެންޑީއެފުން ހާމަކޮށްފައިވެ އެވެ.
ކޮމެންޓު ފޮނުވާ