ދިވެހިރާއްޖޭގެ އިޤްތިޞާދު ސަރުކާރާ ޙަވާލުވިއިރު ޑިފޯލްޓް ކުރުމަށް ޑިޒައިން ކޮށްފައިވާ ފުން އަނދަވަޅެއްގައި އޮތް ނަމަވެސް މިހާރު އެ އިޤްތިޞާދު ވަނީ ކޮޅަށް ޖެހިފައިކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ. ރާއްޖޭގެ އެކި ރަށްރަށުގައި ތަރައްޤީގެ މަޝްރޫޢުތައް ދިވެހި ކުންފުނިތަކާ ޙަވާލުކުރުމަށް ބޭއްވި ތާރީޚީ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ އިޤްތިޞާދު މި މިސްރާބަށް ގެނެވިފައި ވަނީ ވަރަށް ގިނަ ފަރާތްތަކުގެ އެއްބާރުލުމާއި ސަރުކާރުގެ ތެރެއިން ކުރެވުނު މަސައްކަތުގެ ނަތީޖާއަކަށް ކަމަށެވެ.
މި ތިން ދުވަހުގެ ތެރޭގައި 216 މަޝްރޫޢު 53 ދިވެހި ކުންފުންޏާ ޙަވާލުކުރެވިފައިވާއިރު، މިއީ ހުރިހާ އަތޮޅެއް ހިމެނޭގޮތަށް 123 ރަށެއްގެ ތަރައްޤީއަށް ކުރިއަށް ގެންދާ މަސައްކަތްތަކެކެވެ. ރައީސް ޔަޤީންކަންދެއްވިގޮތުގައި މި މަޝްރޫޢުތަކުގައި ފައިސާ ލިބުމުގައި އެއްވެސް ލަސްވުމެއް ނުވަތަ ޕޭމެންޓްގެ ތަޅުދަނޑިއެއް ދިމާނުވާނެއެވެ.
އާންމުކޮށް ސަރުކާރުގެ ތެރެއިން ފައިސާ ދޫކުރުމުގައި ދިމާވާ ކަހަލަ މައްސަލަތައް މި މަޝްރޫޢުތަކަށް ދިމާނުވާނެކަމަށާއި، މަސައްކަތްތައް ދާދި އަވަހަށް ފެށިގެންދާނެކަމަށްވެސް ރައީސް ވިދާޅުވިއެވެ. މި މަޝްރޫޢުތަކުގެ ސަބަބުން ދިވެހިރާއްޖޭގެ އިޤްތިޞާދު ފުޅާވެ، ޚާއްޞަކޮށް ކޮންސްޓްރަކްޝަން އިންޑަސްޓްރީ ވަރަށް ބޮޑަށް ކުރިއަރައިގެންދާނެކަމަށް ރައީސް ޔަޤީންކުރައްވައެވެ.
ކޮމެންޓު ފޮނުވާ