ރާއްޖޭގެ އިގްތިސޯދު މިހާރު ރަނގަޅު މިސްރާބަކަށް ގެންދެވިފައިވާ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެއެވެ. އުމްރާނީ ތަރައްގީގެ 206 މަޝްރޫއެއް އަމިއްލަ ކުންފުނިތަކާ ހަވާލުކުރުމަށް ބާސެލޯ ނަސަންދުރާގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ވެރިކަމާ ހަވާލުވެވަޑައިގެންނެވިއިރު ފުން އަނދަވަޅަކަށް ވައްޓާލާފައިވާ އިގްތިސޯދު ސަލާމަތްކުރެވިފައިވާ ކަމަށެވެ.
ރައީސް ވިދާޅުވީ ޑިފޯލްޓު ކުރުމަށް ޑިޒައިންކޮށްފައި އޮތް އިގްތިސޯދެއް ނަގާ ކޮޅަށް ޖަހާ، ވަރަށް ގިނަ ފަރާތްތަކުގެ އެއްބާރުލުމާ އެކު ސަރުކާރުން ކުރެވުނު މަސައްކަތުގެ ނަތީޖާއެއްގެ ގޮތުން މިއަދު މި ސޮއިކުރުމާ ހަމައަށް އައިސްފައިވާ ކަމަށެވެ. އިގްތިސޯދުގައި ބުންވަރު ނެތް ނަމަ އަމިއްލަ ކުންފުނިތަކާ އެކު މަޝްރޫއުތައް ކުރިއަށް ގެންދަން އެއްބަސްވުންތަކުގައި ސޮއިނުކުރެވޭނެ ކަމަށާއި، އިގްތިސޯދާ މެދުގައި ސަރުކާރާ މެދުގައި ޕްރައިވެޓް ސެކްޓާގެ އިތުބާރު ނެތް ނަމަ މި ހިސާބަކަށް ނުގެނެވޭނެ ކަމަށް އެ މަނިކުފާނު ވިދާޅުވިއެވެ.
މިއަދު ސޮއިކުރި 206 މަޝްރޫއުގެ އިތުރުން ފާއިތުވި ދެ ދުވަހު ސޮއިކުރި މަޝްރޫއުތަކާ އެކު ޖުމްލަ 216 މަޝްރޫއެއް 123 ރަށެއްގައި ކުރިއަށް ގެންދަން 53 ކުންފުންޏަކާ ހަވާލުކޮށްފައިވާކަން ރައީސް ފާހަގަކުރެއްވިއެވެ. މީގެ ނަތީޖާއަކަށް ވާނީ ރާއްޖޭގެ އިގްތިސޯދު ފުޅާވެގެން ދިއުމާއި، އިގްތިސޯދަށް ދިރުން އައުމާއި، ކޮންސްޓްރަކްޝަން އިންޑަސްޓްރީ ހާއްސަ ގޮތެއްގައި ކުރިއަރައިގެން ދިއުން ކަމަށް ރައީސް ވިދާޅުވިއެވެ. މަސައްކަތް ހަވާލުކުރި ކުންފުނިތަކަށް ފައިސާ ލިބުމުގައި ލަސްތަކެއް ނާންނާނެ ކަމަށާއި، އާންމުކޮށް ސަރުކާރު ތެރެއިން ފައިސާ ދޫކުރުމުގައި ހުންނަ ދަތިކަމުގެ ތެރެއިން އަންނަ ޑިލޭތައް މި މަޝްރޫއުތަކުގައި ނާންނާނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ