ބާސެލޯ ނަސަންދުރާގައި މިއަދު ބޭއްވި ހާއްސަ ރަސްމިއްޔާތުގައި، ތަރައްގީއާ ގުޅޭ 206 މަޝްރޫއެއް ރާއްޖޭގެ 53 އަމިއްލަ ކުންފުންޏާ ހަވާލުކޮށް ސަރުކާރުން ރެކޯޑެއް ގާއިމްކޮށްފި އެވެ. މި މަޝްރޫއުތައް ކޮންޓްރެކްޓަ ފައިނޭންސްގެ އުސޫލުން ހިންގާނެ އިރު، މަސައްކަތުގެ އުޖޫރަ ދިނުމުގައި އެއްވެސް މައްސަލައެއް ނުޖެހޭނެ ކަމަށް ރައީސް ޑރ. މުހައްމަދު މުއިއްޒު ކަށަވަރު ކުރައްވައިފި އެވެ.
ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، ކުންފުނިތަކުން މަސައްކަތް ކުރުމަށްފަހު ފައިސާ ހޯދަން ހުށަހެޅުމުން އާންމުކޮށް ސަރުކާރުން ފައިސާ ދޫކުރުމުގައި އަންނަ ތާށިކަމާއި ޑިލޭތައް މިފަހަރު އެއްވެސް ވަރަކަށް ނާންނާނެ ކަމަށެވެ. އެހެންކަމުން އެއްބަސްވުމުގައި ވާ ގޮތަށް ކުންފުނިތަކުން މަސައްކަތް ކުރުމަށް މަޖުބޫރުވާނެ ކަމަށާއި، މި މަޝްރޫއުތައް "ވަރަށް ހަލުވި ދުވެލީގައި" އަދި "ވަރަށް އެފިޝަންޓުކޮށް" ނިންމާލެވޭނެ ކަމަށް އެމަނިކުފާނު ވިދާޅުވި އެވެ.
ރައީސް ފާހަގަކުރެއްވި ގޮތުގައި، މިއަދު ހަވާލުކުރި ހުރިހާ ކުންފުންޏަކުން ވެސް ތިން އަހަރުގެ އޮޑިޓް ރިޕޯޓާއި ބޭންކުން ބޭނުންވާ ހުރިހާ އިޖުރާއަތްތަކެއް ފުރިހަމަކޮށްފައިވާއިރު، އެހީވެ ރަނގަޅަށް ހިންގަމުންދާ، ރަނގަޅު މެނޭޖްމަންޓު ޓީމެއް އޮތް ކުންފުނިތަކަކުން މަސައްކަތްތައް ހަވާލުވެއްޖެ އެވެ. މި މަޝްރޫއުތަކުގެ ތެރޭގައި ތަފާތު 13 ރަށެއްގައި 825 ހައުސިން ޔުނިޓް އަޅާ މަޝްރޫއުތަކާއި، ރާއްޖޭގެ ހުރިހާ ސްކޫލެއްގައި އޭސީ ހަރުކުރާ "ކޫލް ސްކޫލް ޕްރޮޖެކްޓް" ވެސް ހިމެނެ އެވެ. އަމަލީ މަސައްކަތް މިއަދުން ފެށިގެން 21 ދުވަހުގެ ތެރޭގައި ފަށަން ޖެހޭ ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވީ، މިއީ ރާއްޖޭގެ އިގުތިސާދު ފުޅާވެ ދިރުންލިބޭނެ، ހާއްސަކޮށް އިމާރާތް ކުރުމުގެ ދާއިރާ ކުރިއަރާނެ ކަމަށާއި، ރައްޔިތުންނަށް ވެފައިވާ ވައުދުތައް ތެދުވެރިކަމާއި އަމާނާތްތެރިކަމާއެކު އަދާކުރުމުގެ ނިޔަތުގައި މި މަސައްކަތްތައް މުޅި ސަރުކާރު ގުޅިގެން ކުރިއަށް ގެންދާ ކަމަށެވެ.
ކޮމެންޓު ފޮނުވާ