މާލޭގެ މަގުތައް އަމާން ރައްކާތެރި ތަނަކަށް ހެދުމަށް ދިވެހި ފުލުހުންގެ ޚިދުމަތުން ފާއިތުވި އޮކްޓޫބަރު މަހު ކުރިއަށްގެންދިޔަ އޮޕަރޭޝަންތަކުގައި 4633 މީހަކު ހުއްޓުވައި ސުވާލުކޮށްފައިވާކަމަށް ތަފާސްހިސާބުތައް ދައްކައިފިއެވެ. މި މީހުންގެ ތެރެއިން 4555 މީހުންނަކީ ކުށުގެ ރިކޯޑު އޮތް މީހުންކަމަށް ފުލުހުން ހާމަކުރިއެވެ.
މި މަހު މާލެ ފްރޮންޓް ލައިން ޕޮލިސިންގ އިން 26262 ސަރަހައްދެއް ބަލައި ފާސްކޮށް، 1136 ގަޑިއިރާއި 8 މިނެޓު ވަންދެން ފައި މަގުގައި ޕެޓްރޯލްކޮށްފައިވެއެވެ. މި މުއްދަތުގައި ވައްކަމާއި މާރާމާރީއާއި ފޭރުމާއި އެކްސިޑެންޓުގެ ޖުމްލަ 151 ސީންއަކަށް ފުލުހުން އެޓެންޑުވިއެވެ.
ގެއްލިގެން ރިޕޯޓުކުރި 250 އެއްޗެއް ހޯދި ކަމަށާއި އެތަކެތީގެ އަގު 5.7 މިލިއަން ރުފިޔާއަށް އަރާކަމަށް ފުލުހުން ބުނެއެވެ. ހޯދި ތަކެތީގެ ތެރޭގައި 110 ސައިކަލާއި 31 މޯބައިލް ފޯނާއި ފައިސާ އާއި އެހެނިހެން އިލެކްޓްރޯނިކްސް ހިމެނެއެވެ. މީގެ އިތުރުން ބިދޭސީންނާ ގުޅޭގޮތުން ކުރިއަށްގެންދިޔަ އޮޕަރޭޝަންތަކުގައި ދެ ބިދޭސީއަކު އިމިގްރޭޝަނާ ހަވާލުކޮށް، އާންމުން ހޭލުންތެރިކުރުމަށް 28 ޕްރޮގްރާމެއް ކުރިއަށް ގެންގޮސްފައިވެއެވެ.
ކޮމެންޓު ފޮނުވާ