ރައްޔިތުންގެ މަޖިލީހުގެ ޖުޑިޝަރީ ކޮމެޓީގެ މުގައްރިރުކަމުން މަނަދޫ ދާއިރާގެ މެންބަރު ހުސްނީ މުބާރިކް މިއަދު އިސްތިއުފާ ދެއްވުމާއެކު، އެ މަގާމަށް ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު އައްޔަން ކުރައްވައިފިއެވެ.
ހުސްނީ މުބާރިކް މި މަގާމުން އިސްތިއުފާ ދެއްވީ ޖުޑީޝަލް ސާވިސް ކޮމިޝަންގެ މެންބަރުކަމަށް އިންތިހާބުވެ، އެ މަގާމުގެ ހުވާ ކުރައްވަން ޖެހުމުންނެވެ. މިއަދު ރައީސް އޮފީހުގައި ބޭއްވި ރަސްމިއްޔާތެއްގައި ހުސްނީ މުބާރިކް ވަނީ ސުޕްރީމް ކޯޓްގެ ފަނޑިޔާރު އަލީ ރަޝީދު ހުސައިންގެ ހަޟުރުގައި ހުވާ ކުރައްވައި ހުވާގެ އިގްރާރުގައި ސޮއި ކުރައްވާފައެވެ.
މިއަދުގެ ޖުޑިޝަރީ ކޮމެޓީގެ ބައްދަލުވުމުގައި މުގައްރިރުކަމަށް އައްޔަން ކުރެވުނީ ކުރިން ނައިބު މުގައްރިރުގެ މަގާމުގައި ހުންނެވި އަބްދުއްސައްތާރު މުހައްމަދު އެވެ. މި ނިންމުން ނެގީ ކޮމެޓީގެ އަޣުލަބިއްޔަތުންނެވެ. އަލަށް އައްޔަންކުރި ނައިބު މުގައްރިރަކީ ފުނަދޫ ދާއިރާގެ މެންބަރު މުހައްމަދު މަމްދޫހެވެ. ޖުޑިޝަރީ ކޮމެޓީއަކީ ޖުޑީޝަލް ސާވިސް ކޮމިޝަން ހިމެނޭ ގޮތުން ޝަރުއީ ދާއިރާގެ މަސައްކަތްތައް ބަލައި ޖަވާބުދާރީކުރުވުމުގެ މަސްއޫލިއްޔަތު އޮންނަ މުހިންމު ކޮމެޓީއެކެވެ.
ކޮމެންޓު ފޮނުވާ