ހުޅުމާލޭގެ މަގުތަކުގައި ދިގު މުއްދަތަކަށް ބޭނުންނުކޮށް ބަހައްޓާފައިވާ 716 އުޅަނދު ފުލުހުން ވަނީ ދެނެގަނެފައެވެ. މި މަސައްކަތް ކުރީ މިދިޔަ އަންގާރަ ދުވަހު ހުޅުމާލޭގެ އެކި ސަރަހައްދުތަކުގައި ހުރި ހަލާކުވެފައިވާ އުޅަނދުތަކުގެ މައުލޫމާތު އެއްކުރުމަށް ކުރި އޮޕަރޭޝަނެއްގެ ތެރެއިންނެވެ.
ފުލުހުން ބުނީ، އެ މަސައްކަތުގައި ދެނެގަތް އުޅަނދުތަކުގެ ތެރޭގައި ކާރާއި ސައިކަލާއި ޕިކަޕު، ވޭން ހިމެނޭ ކަމަށެވެ. މި މައުލޫމާތު ޓްރާންސްޕޯޓު މިނިސްޓްރީއާއި ހައުސިން ޑިވެލޮޕްމަންޓް ކޯޕަރޭޝަންއާ އެއްކޮށް ކަމާގުޅޭ އިދާރާތަކުން ހިއްސާކޮށްފައިވާ ކަމަށް ވެސް ފުލުހުން ބުންޏެވެ. މި މަސައްކަތުގެ މަގްސަދަކީ ހުޅުމާލޭގެ މަގުތައް ތަރުތީބު ކުރުމާއި އަމާން ރައްކާތެރި ތަނެއްގެ ގޮތުގައި ބެލެހެއްޓުމެވެ.
މިދިޔަ ފެބްރުއަރީ މަހު ފުލުހުން މާލޭގެ މަގުތަކުން 400 އަށްވުރެ ގިނަ ބޭނުންނުކުރާ ވެހިކަލް ނަގާފައިވާއިރު، މާލޭގެ އެންމެ ބޮޑު މައްސަލައަކަށް ޕާކިން މައްސަލަ ވަނީ ވެފައެވެ. ކެރީން ކެޕޭސިޓީއަށްވުރެ ގިނަ އުޅަނދު ބޭނުންކުރާތީ، ޕާކުކުރާނެ ޖާގަ ނުލިބި، ފީ ދައްކަމުން ދިޔަ ނަމަވެސް ނުގަވާއިދުން ޕާކުކުރުމުން ސްޓިކާ ޖެހުމާއި ޓޯ ކުރުން ފަދަ ކަންކަމަށް އާންމުން ތަކުރާރުކޮށް ޝަކުވާ ކުރަމުންދާއިރު މިއަދާ ހަމަޔަށް އެ މައްސަލައަށް ދާއިމީ ހައްލެއް ނުލިބެއެވެ.
ކޮމެންޓު ފޮނުވާ