އައްޑޫ ސިޓީ ކައުންސިލް އެކުލަވާލާފައިވާ ގޮތަށް ބަދަލު ގެންނަން ބޭނުންވާކަމަށް އައްޑޫގެ ބައެއް ފަރާތްތަކުން ރައީސުލްޖުމްހޫރިއްޔާއަށް ހުށަހެޅުމާ ގުޅިގެން ރައްޔިތުންގެ ޚިޔާލު ހޯދުމަށް ބާއްވާ ރިފަރަންޑަމްގައި ސަރުކާރުން އިޚްތިޔާރުކުރާ ވަކި ނަތީޖާއެއް ނެތްކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްފައިވެއެވެ.
ވަޒީރުންގެ މަޖިލީހުން އިއްޔެ ނިންމެވީ އައްޑޫ ފޭދޫ، ހުޅުދޫ، މީދޫގައި މި އޮކްޓޫބަރު މަހުގެ 24 ނުވަތަ 25 ގައި ރިފަރަންޑަމް ބޭއްވުމަށެވެ. މި ރަށްރަށަށް ވަކި ކައުންސިލްތައް އުފެއްދޭތޯ ނުވަތަ ހުޅުދޫ އާއި މީދޫ އެއް ކައުންސިލެއްގެ ދަށަށް ގެނެސްގެން "އައްޑޫ ހުޅުމީދޫ ކައުންސިލް" އުފެއްދޭތޯ މި ވޯޓުގައި ރައްޔިތުންގެ ޚިޔާލު ހޯދާނެއެވެ.
މީސްމީޑިއާގައި ރައީސް ކުރެއްވި ޕޯސްޓެއްގައި ވިދާޅުވީ މި ރިފަރަންޑަމްގައި ސަރުކާރުގެ ވަކި ސްޓޭންޑެއް ނެތްކަމަށާއި ރައްޔިތުންގެ މެޖޯރިޓީން ނިންމަވާ ކޮންމެ ނިންމުމެއް ސަރުކާރުން ތަންފީޒު ކުރާނެ ކަމަށެވެ. މި ރިފަރަންޑަމް ކުރިއަށް ގެންދިއުމުގެ އިންތިޒާމުތައް ހަމަޖައްސާނީ ރައްޔިތުންގެ ޚިޔާލު ހޯދުމުގެ އާންމު ވޯޓު ނެގުމުގެ ޤާނޫނާ އެއްގޮތްވާ ގޮތުގެ މަތިންނެވެ.
ވޯޓުގެ ނަތީޖާއާ ގުޅިގެން އައްޑޫ ސިޓީގެ ރަށްރަށުގެ އިޚްތިޞާޞަށް އަތުވެދާނެ ބަދަލުތައް ދެނެގަތުމަށް ސިޓީތަކާއި އިދާރީ ދާއިރާތަކާ ބެހޭ ވުޒާރާއިން ފަންނީ ޓީމެއް އެކުލަވައިލައިގެން މަސައްކަތްތައް ފަށަން ވަޒީރުންގެ މަޖިލީހުން ނިންމައިފިއެވެ.
ކޮމެންޓު ފޮނުވާ