މިއަދު ފާހަގަކުރާ މުދައްރިސުންގެ ދުވަހުގެ މުނާސަބަތުގައި ކޮމިޝަނަރ އޮފް ޕޮލިސް އިސްމާޢީލް ނަވީން ދިވެހި ފުލުހުންގެ ޚިދުމަތުގެ މުދައްރިބުންނަށް ހާއްސަ މެސެޖެއް ދެއްވައިފިއެވެ. މި މެސެޖުގައި ކޮމިޝަނަރ ވަނީ ޕޮލިސް އިންސްޓްރަކްޓަރުންނާއި ޓްރެއިނަރުންނާއި މެންޓަރުންނަށް އިހުލާސްތެރިކަމާއެކު ޝުކުރު ދަންނަވާފައެވެ.
ކޮމިޝަނަރ ވިދާޅުވީ ޕްރޮފެޝަނަލިޒަމާއި ނަޒާހަތްތެރިކަމާއި ހިދުމަތުގެ އަސާސްތައް ފުލުހުންނަށް އުނގަންނައިދިނުމުގައި މުދައްރިބުން ކުރައްވާ މަސައްކަތަކީ ޕޮލިސިންގެ ރޮނގުން ފުލުހުންނަށް ލިބިފައިވާ ކުރިއެރުމުގެ ބިންގާ ކަމުގައެވެ. މުދައްރިބުންގެ އިރުޝާދުގެ ދަށުން ފުލުހުންނަށް އިލްމާއި ހުނަރު ލިބުމާއެކު، ހަގީގީ ފުލުހުންގެ ރޫހު ދައްކުވައިދޭ ހިތްވަރާއި އޯގާތެރިކަމާއި އަހުލާގީ ރިވެތި ސިފަތައް ވެސް ލިބިގެންދާކަން ކޮމިޝަނަރ ފާހަގަކުރެއްވިއެވެ.
ދިވެހި ރައްޔިތުންނަށް ހިދުމަތްކުރުމަށް މަސައްކަތްކުރާ ހަރުދަނާ، ހުނަރުވެރި އަދި މުޖުތަމައުގެ މައްޗަށް ބިނާވެފައިވާ ފުލުހުންގެ މުއައްސަސާއެއް ބިނާކުރުމުގައި މުދައްރިބުންގެ ދައުރު މުހިންމު ކަމަށް ވިދާޅުވެ، ފުލުހުންނަށް ތަމްރީނުދީ އުނގަންނައިދިނުމަށް މުދައްރިބުން ކުރައްވާ އިހުލާސްތެރި މަސައްކަތާއި ބަހައްޓާ ޝައުގުވެރިކަމާއި ކެތްތެރިކަމަށް ކޮމިޝަނަރ ޝުކުރުއަދާކުރެއްވިއެވެ.
ކޮމެންޓު ފޮނުވާ