ބައިނަލްއަގުވާމީ ގޮތުން ފާހަގަކުރާ ޓީޗަރުންގެ ދުވަހާއި ގުޅިގެން މުދައްރިސުންނަށް ތަހުނިޔާއާއި ހެޔޮއެދުންތައް ފޮނުއްވައި، ކުރީގެ ރައީސް އިބްރާހިމް މުހައްމަދު ސާލިހު އެކްސްގައި ކުރެއްވި ޕޯސްޓެއްގައި، މުދައްރިސުންގެ ޒިންމާއަކީ ގައުމެއްގެ މުސްތަގުބަލް ބައްޓަންކުރުމުގެ އިންތިހާއަށް ބޮޑު ޒިންމާއެއް ކަމަށާއި ސިކުނޑިތައް ތަރުބިއްޔަތުކުރުމުގެ މުހިންމު ކަމެއް ކަމަށް ވިދާޅުވެއްޖެއެވެ.
ރައީސް އިބޫ ފާހަގަކުރެއްވި ގޮތުގައި، ރަނގަޅު ވިސްނުމާއި ހިޔާލުތައް ދަރިވަރުންގެ ކިބައިގައި އަށަގަންނުވައި، އުޅުމަށް ރަނގަޅު ބަދަލުތަކެއް ގެނައުމަށް މަގުފަހި ކުރުމަކީ މުދައްރިސުންގެ މައްޗަށް އޮތް މުހިންމު ޒިންމާއެކެވެ. އަދި ރަނގަޅު މުޖުތަމައުއެއް ބިނާކުރުމަށް ހުރިހާ ގޮތަކުން މުދައްރިސުން މަސައްކަތްކޮށް ބާރު އަޅަންޖެހޭ ކަމަށް އެމަނިކުފާނު ވިދާޅުވިއެވެ.
ރައީސް އިބޫ އަކީ އަބަދުވެސް މުދައްރިސުން ކުރާ ބުރަ މަސައްކަތް ފާހަގަކުރައްވާ ވެރިއެކެވެ. އެމަނިކުފާނުގެ ވެރިކަމުގައި މުދައްރިސުންގެ ކަންބޮޑުވުންތަކަށް އަޑު އައްސަވައި މުސާރަ އިތުރުކޮށްދެއްވުމާއެކު، ތައުލީމީ ދާއިރާއަށް ދިވެހި ޒުވާނުން ވެއްދުމަށް ޝައުގުވެރިކަން އިތުރުކުރުމުގެ ޚާއްސަ މަސައްކަތްތަކެއް ކޮށްފައިވެއެވެ. ދުނިޔޭގައި އެންމެ ފުރަތަމަ މުދައްރިސުންގެ ދުވަސް ފާހަގަކުރަން ފެށީ 1994 ވަނަ އަހަރުގެ އޮކްޓޫބަރު 5 ގައެވެ. މިއަހަރު ޔުނެސްކޯއިން ކަނޑައަޅާފައިވާ ޝިއާރަކީ "ރީކާސްޓިން ޓީޗިންގް އޭޒް އަ ކޮލަބޮރޭޓިވް ޕްރޮފެޝަން" ކަމަށްވާއިރު، މިއިން ދޭހަކޮށްދެނީ އުނގަންނައިދިނުމަކީ ގުޅިގެން ކުރެވޭ މަސައްކަތަކަށް ހެދުމުގެ މުހިންމުކަމެވެ.
ކޮމެންޓު ފޮނުވާ