ޣައްޒާއަށް އިންސާނީ އެހީ ގެންދިޔަ ފްލޮޓިއްލާ ހުއްޓުވުން ރައީސް މުޢިއްޒު ކުށްވެރިކުރައްވައިފި

ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ކަނޑުމަގުން ދަތުރުކުރި ގްލޯބަލް ސުމޫދު ފްލޮޓިއްލާގެ އުޅަނދުތައް ބައިނަލްއަޤްވާމީ ކަނޑުގެ ސަރަހައްދުން އިސްރާއީލުން ހުއްޓުވުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހަރުކަށި ބަހުން ކުށްވެރިކުރައްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ފާހަގަކުރެއްވި ގޮތުގައި، މި ފްލޮޓިއްލާގައި ހިމެނެނީ ހަތިޔާރެއް ނެތް އާންމު ރައްޔިތުން ކަމަށާއި، އެމީހުން ގެންދިޔައީ ހާލުގައިޖެހި އަސާސީ ހައްޤުތަކުން މަޙްރޫމްވެފައިވާ ޣައްޒާގެ ރައްޔިތުންނަށް އިންސާނީ އެހީގެ ސަމާނުކަމަށެވެ. ބައިނަލްއަޤްވާމީ ކަނޑުގެ ސަރަހައްދުން މިފަދަ އުޅަނދުތައް ހުއްޓުވައި ބިރުދެއްކުމަކީ އިންސާނިއްޔަތާއި ބައިނަލްއަޤްވާމީ ޤާނޫނުތަކާ ޚިލާފު ޢަމަލެއްކަމަށް ރައީސް ވިދާޅުވިއެވެ.

އިސްރާއީލުން މިފަދަ ޢަމަލުތައް ތަކުރާރުކުރުމުން ދުނިޔޭގެ އެހެން ޤައުމުތަކާ އެއްފަރާތްވަމުންދާކަމަށާއި، މިއީ އިންސާނީ ކަރާމާތަށް ހުރުމަތްތެރިކޮށް ނުހިތުމާއި އަޅާލުމާ ކުލުނުނެތްކަން ސާބިތުކޮށްދޭ ކަމެއްކަމަށް ރައީސުލްޖުމްހޫރިއްޔާ ވިދާޅުވިއެވެ. މިފަދަ ޢަމަލުތައް ހުއްޓުވުމަށް ބައިނަލްއަޤްވާމީ މުޖްތަމަޢަށް އެމަނިކުފާނުވަނީ ގޮވާލައްވާފައެވެ.

ދިވެހިރާއްޖެ އިންކްލޫޑްކޮށް 44 ޤައުމެއްގެ ރައްޔިތުން އިސްނަގައިގެން އިންތިޒާމްކޮށްފައިވާ މި ގާފިލާގައި 500އަށްވުރެ ގިނަ އެކްޓިވިސްޓުން ބައިވެރިވެއެވެ. އޭގެތެރޭގައި ބައެއް ޤައުމުތަކުގެ ޕާލަމެންޓް މެންބަރުންނާއި ޤާނޫނީ ވަކީލުންވެސް ހިމެނެއެވެ. ދިވެހިރާއްޖެއިން މި ދަތުރުގައި ބައިވެރިވަނީ އިންޓަނޭޝަނަލް އެއިޑް ކެމްޕެއިންގެ ސެކްރެޓަރީ ޖެނެރަލް އިބްރާހީމް ޝާޒެވެ.

ފްލޮޓިއްލާ އިންތިޒާމުކުރާ ފަރާތުން ހާމަކޮށްފައިވާ ގޮތުގައި، އިސްރާއީލް ސިފައިން ހަތިޔާރާއެކު 13 އުޅަނދަކަށް އަރައިގަނެ ހުއްޓުވާފައިވާއިރު، އިތުރު 30 އުޅަނދެއް އަދިވެސް ޣައްޒާއަށް ދަތުރުކުރަމުންދެއެވެ. އިސްރާއީލް ސިފައިން އުޅަނދުތަކަށް އަރައިގަންނަ މަންޒަރުތައް ފެންނަ ވީޑިއޯތައް އެކްޓިވިސްޓުން ޢާންމުކޮށްފައިވާއިރު، އެމީހުން ބެލުމުގެ ދަށަށް ގެންދިއުމަކީ ޣައިރު ޤާނޫނީ ޢަމަލެއްކަމަށް އެފަރާތްތަކުން ބުނެފައިވެއެވެ.

ރައީސުލްޖުމްހޫރިއްޔާ ވިދާޅުވި ގޮތުގައި، ދިވެހިން އަބަދުވެސް ތިބޭނީ ފަލަސްޠީނުގެ ރައްޔިތުންގެ އިންސާނީ ހައްޤުތައް ކަށަވަރުކޮށް، އިންސާފު ހޯދައި، ސުލްހައާއި ސަލާމަތްތެރިކަން ޤާއިމުކުރުމަށް ކުރާ މަސައްކަތުގައި އެކުގައެވެ.