ކ. ކާށިދޫގައި ކެފޭގެ ނަމުގައި މަސްތުވާތަކެތި ވިއްކަމުންދާ ކަމަށް ޝައްކުކުރެވޭ ތިން ތަނެއް ފުލުހުން ބަންދުކޮށް، މާލެއިން އެ ރަށަށް މަސްތުވާތަކެތި އެތެރެކުރި ކަމަށް ތުހުމަތުކުރެވޭ ދެ ފަރާތެއް ހައްޔަރުކޮށްފައިވެއެވެ.
މާލެއިން ކާށިދޫއަށް މަސްތުވާތަކެތި ގެންދާ ކަމުގެ މައުލޫމާތު ލިބުމާ ގުޅިގެން މިއަދު ފުލުހުން ހިންގި ޚާއްސަ އޮޕަރޭޝަނެއްގައި، ރަށުގެ މަގުމަތިން ހުއްޓުވާލެވުނު ދެ މީހުންގެ އަތުން 9.27 ގްރާމުގެ މަސްތުވާތަކެއް ފެނިފައިވާ ކަމަށް ފުލުހުން ބުނެއެވެ.
ހައްޔަރުކުރެވުނު ފަރާތްތަކަކީ މާލެ، މ. ނަލަހިޔާމަންޒިލްގެ ޙަސަން މުނާޒް (40 އަހަރު) އާއި މާލެ، މ. ބިންއުނިމާގޭގެ އިބްރާހީމް ޒައިދު (46 އަހަރު) ކަމަށް ފުލުހުން މައުލޫމާތު ދެއްވައެވެ. މި ދެ މީހުންނަކީ ކާށިދޫއަށް މަސްތުވާތަކެތި އެތެރެކޮށް، އެ ތަކެތި ވިއްކާ އަދި ބޭނުންކުރާ ކަމުގެ ތުހުމަތު ކުރެވޭ ފަރާތްތަކެއް ކަމަށްވެސް ފުލުހުން ވިދާޅުވެއެވެ.
މި އޮޕަރޭޝަނުގެ ދަށުން ކާށިދޫގައި މަސްތުވާތަކެތީގެ ވިޔަފާރި ކުރާ ކަމަށް ޝައްކުކުރެވޭ އެތަކެއް މީހުންނާއި ތަންތަން ބަލައިފާސްކޮށްފައިވާ ކަމަށް ފުލުހުން ހާމަކުރެއްވިއެވެ. އަދި މި މައްސަލައާ ގުޅިގެން އިތުރު ތަހުގީގުތައް ކުރިއަށް ގެންދާ ކަމަށްވެސް ފުލުހުން ވިދާޅުވެއެވެ.
ކޮމެންޓު ފޮނުވާ