މަޖިލީހުން މިއަދު ފާސްކުރި މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގައި ޤާނޫނު އަސާސީއާ ޚިލާފު އެއްވެސް ކަމެއް ނެތް ކަމަށް ރައްޔިތުންގެ މަޖިލީހުގެ ކައުންސެލް ޖެނެރަލް އަލްއުސްތާޛާ ފާތިމަތު ފިލްޒާ ވިދާޅުވެއްޖެއެވެ. އަދި އެ ބިލުން ރައްޔިތުންގެ އަސާސީ ޙައްޤުތަކަށް އުނިކަމެއް ނާންނާނެ ކަމަށް ވެސް އޭނާ ފާހަގަކުރެއްވިއެވެ.
މީޑިއާ ބިލަށް ސަރުކާރުން ހުށަހަޅާފައިވާ އިސްލާހުތަކާއެކު އިއްޔެ ފާސްކޮށްފައިވީ ނަމަވެސް، ކައުންސެލް ޖެނެރަލްގެ އިތުރު ލަފާތަކެއް ލިބިފައިވާތީ، އެ ހުށަހެޅުންތައް ހިމަނައިގެން ބިލް އަލުން ފާސްކުރަން ކޮމެޓީން މިއަދު ނިންމިއެވެ.
ސަރުކާރުން މި ބިލަށް ޖުމުލަ 14 އިސްލާހެއް ހުށަހަޅާފައިވެއެވެ. އޭގެ ތެރޭގައި ބްރޯޑްކާސްޓިން ކޮމިޝަނުގެ މަސްއޫލިއްޔަތުތަކުގެ ގޮތުގައި އިސްލާމްދީނާ ޚިލާފު ކޮންޓެންޓާއި، އަޚްލާޤީ މިންގަނޑުތަކާ ޚިލާފު މަންޒަރުތަކާއި، ފާޙިޝް ޢަމަލުތައް ކުރުމަށް ހިތްވަރުދޭ ކޮންޓެންޓް ފެތުރުން މަނާކުރުމަށް އަޅަންޖެހޭ ފިޔަވަޅުތައް އެޅުން ހިމެނިފައިވެއެވެ.
ކޮމިޝަނުގެ މެންބަރުން އައްޔަންކުރުމާއި ވަކިކުރުމުގައި ރައީސުލްޖުމްހޫރިއްޔާގެ ބައިވެރިވުން ނުހިމެނޭ ގޮތަށް ބަދަލުކުރުމަށާއި، ކޮމިޝަނުގެ ރައީސް ހޮވުމުގައި ވެސް ރައީސުލްޖުމްހޫރިއްޔާގެ ދައުރެއް ނޯންނާނެ ގޮތަށް މާއްދާތައް އިސްލާހުކުރުމަށް ނިންމާފައިވެއެވެ. ހަމައެއާއެކު ކޮމިޝަނަށް މެންބަރުން ހޮވުމުގައި ސިޔާސީ ޕާޓީތަކުގެ މެންބަރުން ނުހިމެނޭނެ ގޮތަށް ޝަރުޠުތައް ކަނޑައެޅުމަށް ވެސް އެއްބަސްވެފައިވެއެވެ.
މީޑިއާގެ ސުލޫކީ މިންގަނޑުތަކުގެ ތެރޭގައި ޞައްޙަ މަޢުލޫމާތު ފޯރުކޮށްދިނުމާއި، އިންސާފުވެރިކަމާއި ހާމަކަން ބޮޑު އުސޫލުތަކުގެ މަތިން ޚަބަރު ގެނެސްދިނުމަށް އަހަމިއްޔަތުކަން ދިނުމަށް ބާރުއެޅުމަށް ނިންމާފައިވެއެވެ. މީހުންގެ އަމިއްލަ މަޢުލޫމާތު ރައްކާތެރިކުރުމާ ގުޅޭ ގޮތުން ވެސް މުހިންމު އިސްލާހުތަކެއް ގެނައުމަށް ކޮމެޓީން ފާސްކޮށްފައިވެއެވެ.
މި ބިލް މިއަދު ރައްޔިތުންގެ މަޖިލީހުން ވަނީ ފާސްކޮށްފައެވެ. އެހެންނަމަވެސް އަދި ރައީސް މިބިލް ތަސްދީގު ކުރައްވާފައެއް ނުވެއެވެ.
ކޮމެންޓު ފޮނުވާ