ޢަރަބި އިސްލާމީ ޤައުމުތަކުގެ ކުއްލި ސަމިޓުގައި ބައިވެރިވެވަޑައިގަންނަވަން ޤަޠަރަށް ކުރައްވާ ރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޤަޠަރުގެ އަމީރު ޝައިޚް ތަމީމް ބިން ޙަމަދު އަލްޘާނީއާ ބައްދަލުކުރައްވައިފިއެވެ. މި ބައްދަލުވުން ބޭއްވުނީ ފަލަސްޠީނުގެ ކަންކަމާ ގުޅޭގޮތުން އޯގަނައިޒޭޝަން އޮފް އިސްލާމިކް ކޯޕަރޭޝަންގެ މެންބަރު ޤައުމުތަކުގެ އިސްވެރިން އެއްތަންވާ ވަގުތެއްގައެވެ.
ބައްދަލުކުރެއްވުމުގައި ރައީސް މުޢިއްޒު، އިޒްރޭލުން ޤަޠަރަށް ދިން ހަމަލާ ހަރުކަށި އިބާރާތުން ކުށްވެރިކުރައްވައި، އެ ހަމަލާގައި ޝަހީދުވި ފަރާތްތަކުގެ އާއިލާތަކަށް ތަޢުޒިޔާ އަރިސްކުރެއްވިއެވެ. ދިވެހިރާއްޖެ އޮތީ މި ދަތި ވަގުތުގައި ޤަޠަރާ އެކުގައިކަމަށާއި، މެދުއިރުމަތީ ސަރަޙައްދުގައި އަމާންކަން ޤާއިމުކުރުމަށް ކުރަމުންދާ މަސައްކަތްތަކަށް ދިވެހި ސަރުކާރުގެ ފުރިހަމަ އެއްބާރުލުން ލިބޭނެކަމަށް ރައީސް ޔަޤީންކަން ދެއްވިއެވެ.
ފަލަސްޠީނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމުގައި ޤަޠަރުން ކުރައްވާ އިސްނެންގެވުމާއި، ކުއްލި ސަމިޓް އިންތިޒާމުކުރުމުގައި ދައްކުވައިދެއްވި ލީޑަރޝިޕަށް ރައީސް މުޢިއްޒު ޚާއްޞަ ޝުކުރެއް އަދާކުރެއްވިއެވެ. ހަމައެއާއެކު، ދިވެހިރާއްޖެއަށް އެކި ދާއިރާތަކުން ޤަޠަރުން ފޯރުކޮށްދެމުންދާ އެހީތެރިކަމަށްވެސް ރައީސް ޝުކުރު ދަންނަވައި، ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރެވިދާނެ ފުރުޞަތުތަކާ ބެހޭގޮތުން ދެ ލީޑަރުން މަޝްވަރާކުރެއްވިއެވެ.
މުސްލިމު އުއްމަތުގެ މެދުގައި އެކުވެރިކަމާއި އެއްބައިވަންތަކަން ދެމެހެއްޓުމުގެ މުހިންމުކަން ދެ ބޭފުޅުންވެސް ފާހަގަކުރެއްވިއެވެ. ޚާއްޞަކޮށް މިފަދަ ގޮންޖެހުންތައް ކުރިމަތިވާ ވަގުތުތަކުގައި، އިސްލާމީ ޤައުމުތަކުގެ މެދުގައި ވަރުގަދަ ގުޅުމެއް ބޭއްވުމަކީ ސަރަޙައްދީ ސުލްޙަމަސަލަސްކަން ޤާއިމުކުރުމަށް ވަރަށް މުހިންމު ކަމެއްކަމަށް ދެ ލީޑަރުން އެއްބަސްވެވަޑައިގަތެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޤަޠަރަށް ވަޑައިގަތީ ރޭގެ ވަގުތެއްގައި ކަމަށާއި، ކުއްލި ސަމިޓުގައި ރައީސް ޚާއްޞަ ބަޔާނެއް އިއްވަވާނެކަމަށް ރައީސް އޮފީހުން މަޢުލޫމާތު ދީފައިވެއެވެ. މި ސަމިޓުގައި ރާއްޖެ ތަމްސީލުކުރެއްވުމަކީ، ފަލަސްޠީނުގެ ރައްޔިތުންގެ ޙައްޤުތައް ޙިމާޔަތްކުރުމަށް ދިވެހިރާއްޖެއިން ދައްކާ ވަކާލާތު ބައިނަލްއަޤްވާމީ ފެންވަރުގައި ފާޅުކުރެވޭ މުހިންމު ފުރުޞަތެއްކަމަށް ސަރުކާރުގެ އިސްވެރިން ވިދާޅުވެއެވެ.
އިޒްރޭލުން ޣައްޒާގައި ހިންގަމުންދާ ލާއިންސާނީ ޢަމަލުތައް ވަގުތުން ހުއްޓުވައި، ބައިނަލްއަޤްވާމީ ޤާނޫނުތަކާ އެއްގޮތަށް ޢަމަލުކުރުމަށް ދުނިޔޭގެ ޤައުމުތަކުން ގުޅިގެން ފިޔަވަޅު އެޅުމަކީ މިވަގުތު އެންމެ މުހިންމު ކަމެއްކަމަށް ދިވެހި ސަރުކާރުން ދެކޭކަމަށް ރައީސް މުޢިއްޒު ވިދާޅުވިއެވެ. މި ކުއްލި ސަމިޓަކީ މުސްލިމު ޤައުމުތަކުގެ އަޑު އެކަތިގަނޑަކުން އުފުލައި، ސަރަޙައްދުގައި ދާއިމީ ސުލްޙަވެރިކަމެއް ޤާއިމުކުރުމަށް ހަރުދަނާ ފިޔަވަޅުތަކެއް އެޅުމަށް މަގުފަހިވާނެ މުހިންމު ބައްދަލުވުމެއް ކަމަށް އުއްމީދުކުރައްވާ ކަމަށް ރައީސް ފާހަގަކުރެއްވިއެވެ.
ކޮމެންޓު ފޮނުވާ