މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ) އިން ޑޮލަރުން އާމްދަނީ ހޯދުމަށް ޓޫރިޒަމް ދާއިރާގައި މަސައްކަތްކުރަން ފަށާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު އަބްދުލް މަތީން މުހައްމަދު ހާމަކުރައްވައިފިއެވެ. ޕީއެސްއެމްގެ "ރާއްޖެމިއަދު" ޕްރޮގްރާމުގައި ދެއްވި އިންޓަވިއުއެއްގައި މަތީން ވިދާޅުވީ، މި އަހަރު ތެރޭގައި ޑޮލަރު އާމްދަނީ ލިބޭނެ މަގުތައް ތަނަވަސްވެގެންދާނެ ކަމަށެވެ.
އެމްޑަބްލިޔުއެސްސީގެ އަހަރީ އޮޕަރޭޝަނަށް ގާތްގަނޑަކަށް 25 މިލިއަން ޑޮލަރު ބޭނުންވާއިރު، ރާއްޖެއިން ބޭރުން އިމްޕޯޓުކުރާ ސާމާނާއި ޑީސަލް ގަތުމަށް ޑޮލަރު ހޯދުމުގައި ދިމާވާ ދަތިތައް ހައްލުކުރުމަށް ކުންފުނިން އައު ސްޓްރެޓެޖީއެއް ތަންފީޒުކުރަން ފަށާފައިވާ ކަމަށް މަތީން ފާހަގަކުރެއްވިއެވެ. ފާއިތުވި 30 އަހަރު ދުވަހުގެ ތެރޭގައި ކުންފުންޏަށް ޑޮލަރުން އާމްދަނީ ލިބޭނެ ނިޒާމެއް ގާއިމުކުރެވިފައި ނުވުމުން އޮޕަރޭޝަނަލް ޗެލެންޖުތަކާ ކުރިމަތިވަމުންދާ ކަމަށް އޭނާ ވިދާޅުވިއެވެ.
ކުންފުނިން މިހާރު ފޯކަސްކުރާ ދެ މައިގަނޑު ދާއިރާއެއްގެ ތެރޭގައި، ޓޫރިސްޓް ރިސޯޓުތަކާއި ހޮޓާތަކުން ޚިދުމަތުގެ ފީ ޑޮލަރުން ދެއްކުމަށް އެގްރީމަންޓް ހެދުން ހިމެނޭ ކަމަށް މަތީން ބުންޏެވެ. މާލެ އާއި މާފުށި ސަރަހައްދުގައި ހުރި ޓޫރިސްޓް ފެސިލިޓީތަކާއެކު މި ގޮތުން ވާހަކަ ދައްކަން ފަށާފައިވާ ކަމަށް އޭނާ ވިދާޅުވިއެވެ.
މީގެ އިތުރުން، އެމްޓީޑީސީއާ ގުޅިގެން ހދ. ނާގޯށީގައި ތަރައްގީކުރަމުންދާ ރިސޯޓު ޕްރޮޖެކްޓުގައި އެމްޑަބްލިޔުއެސްސީގެ ބައިވެރިވުން ހިމަނާލުމަށް މަޝްވަރާކުރަމުންދާ ކަމަށް މަތީން ހާމަކުރެއްވިއެވެ. ފެނާއި ނަރުދަމާގެ ނިޒާމު ޕްލޭން ކުރުމާއި، ޑިޒައިން ކުރުމާއި، އިމްޕްލިމެންޓޭޝަންގެ ތަޖުރިބާ ކުންފުންޏަށް ލިބިފައިވާތީ، މި ހުނަރުތައް ޓޫރިޒަމް ސެކްޓަރގެ ޑިވެލޮޕްމަންޓް ޕްރޮޖެކްޓުތަކުގައި ބޭނުންކޮށްގެން ޑޮލަރުން އާމްދަނީ ހޯދުމަކީ ވަރަށް ފުރިހަމަ ކަމެއް ކަމުގައި މަތީން ދެކިވަޑައިގަންނަވާ ކަމަށް ވިދާޅުވިއެވެ.
ކުންފުނީގެ ބޯޑާއި މެނޭޖްމަންޓުން މިހާރު އެންމެ އިސްކަމެއް ދެނީ ޑޮލަރުން އާމްދަނީ ހޯދުމުގެ ދާއިމީ ހައްލެއް ގާއިމުކުރުމަށް ކަމަށާއި، މި މަސައްކަތުގެ ނަތީޖާ ކުރިއަށް އޮތް މަސްތަކުގެ ތެރޭގައި ފެންނަން ފަށާނެ ކަމުގެ އުންމީދު އޮތް ކަމަށް މަތީން ވިދާޅުވިއެވެ.
ކޮމެންޓު ފޮނުވާ