ސައްހަ ނޫން ތައުލީމީ ސަނަދުތައް ބޭނުންކޮށްގެން މުހިއްމު ދާއިރާތަކުން ވަޒީފާ ހޯދައިގެން މީހުން އުޅޭ ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ސީއީއޯ މަރިޔަމް ފިޒާނާ ރަޝީދު ވިދާޅުވެއްޖެ އެވެ.
ވަޒީފާ އާއި މަތީ ތައުލީމު ހޯދުމަށް ސައްހަ ނޫން ތައުލީމީ ސެޓްފިކެޓް ހުށަހެޅުމުގެ ގިނަ މައްސަލަތަކެއް ބަލަމުންދާ ކަމަށް ފުލުސް އޮފީހުން އިއްޔެ ވިދާޅުވި ބަޔާނާ ގުޅިގެން ފޭސްބުކްގައި ލިޔުއްވަމުން ފިޒާނާ ވިދާޅުވީ، އެންމެ ހިތާމަކުރައްވަނީ އެ ފަދަ ސަނަދުތަކާއެކު މުހިއްމު ދާއިރާތަކުގައި މީހުން ވަޒީފާ އަދާކުރާތީ ކަމަށެވެ. މިދިޔަ ހަފުތާގައި ވެސް އެ ފަދަ ސަނަދެއް އެމްކިއުއޭއަށް ލިބިފައިވާ ކަމަށް އޭނާ ވިދާޅުވި އެވެ.
މި ފަދަ ފޭކު ސަނަދުތަކަށް މަގު ހުޅުވުނު އެންމެ ބޮޑު ސަބަބަކީ 2017 ވަނަ އަހަރު އެމްކިއުއޭއިން ރާއްޖޭގައި ހިންގާ ކޯސްތަކުގެ ސަނަދުގައި ވެލިޑޭޝަން ސްޓޭމްޕް ޖެހުން ހުއްޓާލުން ކަމަށް ފިޒާނާ ފާހަގަ ކުރެއްވި އެވެ. އެއާއެކު އެ އިދާރާ އާއި ސިވިލް ސާވިސް ކޮމިޝަނާ މަޝްވަރާ ކުރުމަށް ފަހު "ވަރަށް ނުރަނގަޅު" އުސޫލެއް ހެދި ކަމަށް އޭނާ ވިދާޅުވި އެވެ.
އެމްކިއުއޭއިން މިދިޔަ އަހަރު އެ އުސޫލު ހުއްޓުވާފައިވާ އިރު، އެއްވެސް މިނިސްޓްރީއަކުން ވަޒީފާ ދޭން އެމްކިއުއޭގެ ވެލިޑޭޝަން ސްޓޭމްޕް ބޭނުން ކުރުމަކީ މަނާކަމެއް ކަމުގައި އާއްމު އިއުލާނުކޮށްފައިވާނެ ކަމަށް ފިޒާނާ ވިދާޅުވި އެވެ.
އެމްކިއުއޭއިން މިހާރު ދަނީ 2017 ވަނަ އަހަރު ކޮށްފައި ހުރި ޕްރޮގްރާމް އޮޑިޓް އަލުން ޗެކްކުރަމުން ކަމަށާއި، އަލުން ޗެކް ކުރާއިރު ފޯޖުކޮށްފައިވާ ސަނަދެއްގެ މައްޗަށް ކިޔަވާފައި ހުރި ނަމަ އެ ސަނަދެއް ބާތިލް ކުރުމަށް ފުލުހުންނަށް ހުށަހަޅާނެ ކަމަށް އޭނާ ވިދާޅުވި އެވެ. މި ގޮތަށް ފެނުނު ސަނަދުތަކެއް މި އަހަރު ވެސް ފުލުހަށް ހުށަހަޅާފައިވާ ކަމަށް ފިޒާނާ ވިދާޅުވި އެވެ.
"ހަގީގަތުގައި ވެސް މިހާރު ވަޒީފާގައި ތިބި މީހުންގެ ސަނަދުތައް އަލުން ވެރިފައި ކުރާވަރުވެއްޖެ،" ފިޒާނާ ވިދާޅުވި އެވެ.
ސައްހަ ނޫން ސެޓްފިކެޓް ހުށަހެޅުން ނުވަތަ ބޭނުން ކުރުމަކީ ގާނޫނީ ގޮތުން ކުށެއް ކަމަށާއި، ލިޔުމަށް ބަދަލު ގެނައުމާއި އެ ހަދާ ލިޔުން ނަކަލުކުރުމާއި އަގުހުރި އެއްޗެއް ނަކަލުކޮށް އަސްލުގެ ގޮތުގައި ދެއްކުމާއި ޝަހުސު އޮޅުވާލުމަކީ ޖިނާއީ ކުށެއް ކަމަށް ފުލުހުން ބުންޏެވެ.
"މި ފަދަ ކަންކަމާމެދު ވަޒީފާ ދޭ ފަރާތްތަކާއި ތައުލީމު ފޯރުކޮށްދޭ އެންމެހާ މުއައްސަސާތަކުން ސަމާލުވެ، ކޮލިފިކޭޝަން ފްރޭމްވޯކްގެ އޮނިގަނޑަށް އަމަލުކުރުމަށް ހަނދާންކޮށްދެމެވެ،" އިއްޔެ ފުލުހުން ނެރުނު ބަޔާނުގައި ބުނެފައިވެ އެވެ.
ކޮމެންޓު ފޮނުވާ