ޗެލްސީގެ ސެނެގާލު ގޯލްކީޕަރު އެޑޮއާޑް މެންޑީއަށް އަނިޔާވެއްޖެއެވެ.
މެންޑީއަށް އަނިޔާވީ ސެނެގާލުގެ ގައުމީ ފުޓްބޯޅަ ޓީމުން ކުރިއަށް ގެންދިޔަ ފަރިތަކުރުންތަކުގެ ތެރެއިންނެވެ. މި ފަރިތަކުރުންތަކުގެ ތެރެއިން މެންޑީގެ ކަނާތު ފައިގެ ފަލަމަސްގަނޑަށް ވަނީ އަނިޔާވެފައެވެ. އެއާއެކު އޭނާ އަނބުރާ ލަންޑަނަށް ދިޔައިރު، އަނިޔާގެ ފުރިހަމަ ތަފުސީލު ލިބޭނީ ޗެލްސީން ހަދާ ޓެސްޓުތަކަށްފަހު ކަމަށްވެސް ރިޕޯޓުތައް ބުނެއެވެ.
އިނގިރޭސި މީޑިޔާ ރިޕޯޓްތަކުން ބުނާގޮތުން މެންޑީގެ އަނިޔާ އެހާ ސީރިއަސްއެއް ނޫނެވެ.
އަނިޔާގެ ސަބަބުން، ހުކުރު ދުވަހު ސެނެގާލުން މޮރޮކޯއާއި ދެކޮޅަށް ކުޅުނު ބައިނަލްއަގުވާމީ އެކުވެރިކަމުގެ މެޗުގައި އޭނާ ކުޅެފައެއް ނުވެއެވެ. އެ މެޗުން ސެނެގާލް ބަލިވީ 3-1ން ނެވެ.
އުމުރުން 28 އަހަރުގެ މެންޑީއަށް އަނިޔާގެ މައްސަލައަކާ ކުރިމަތިލާން ޖެހުނުއިރު، ރެނެސް ދޫކޮށް އޭނާ ޗެލްސީއާ ގުޅުނީ މިދިޔަ ސެޕްޓެމްބަރު މަހުގެ ފަހުކޮޅެވެ. ޗެލްސީން މެންޑީގެ ސޮއި ހޯދީ ރެނެސްއަށް 22 މިލިޔަން ޕައުންޑް ދެއްކުމަށްފަހުއެވެ.
އެންމެ އަގުބޮޑު ގޯލްކީޕަރުގެ ގޮތުގައި ޗެލްސީގެ ގޯލްކީޕަރު، ސްޕެއިނުގެ ކެޕާ އަރިއްޒަބަލާގާ 2018 ވަނަ އަހަރު ޗެލްސީއަށް ބަދަލުވީ 71.6 މިލިޔަން ޕައުންޑުގެ ފީއަކަށެވެ. އެކަމަކު ޗެލްސީން ކުޅުނު ގިނަ މެޗުތަކުގައި ކެޕާގެ ފަރާތުން ގިނަ ގޯސްތަކެއް ވަނީ ފެނިފައެވެ. އޭނާ ދައްކާ ފީކަޅާ ކުޅުމުގެ ސަބަބުން ވަނީ ފުރަތަމަ އެގާރައިން ޖާގަގެއްލިފައެވެ.
