މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ކުރިޔަށް އޮތް ސީޒަނަށް ތައްޔާރުވުމަށް އިއްޔެ ހަވީރު ފަރިތަކުރުންތައް ފަށައިފި އެވެ.
މާޒިޔާގެ ފަރިތަކުރުންތަކުން ފެނުނު ކުޅުންތެރިންގެ ތެރޭގައި ގައި މި ސީޒަނަށް އެ ކްލަބާއި ގުޅުނު މުޙައްމަދު އުމެއިރު އަދި އައްސަދު ޢަލީ އާއި އެޓީމުގެ މިދިޔަ ސީޒަނުގެ ސްކޮޑުން ފެނުނު ގިނަ ކުޅުންތެރިން ބައިވެރިވެފައިވެއެވެ.
މި މަހު 23 އިން އަންނަ މަހު ހަތަރަކަށް މާލޭގައި ބާއްވަން ތާވަލުކޮށްފައި އޮތް އޭއެފްސީ ކަޕް ދެކުނު އޭޝިއާގެ ގްރޫޕްގެ މެޗުތަކަށް މާޒިޔާ އިން މިދިޔަ މަހު ޕްރެކްޓިސް ފެށިއެވެ. އެއީ އެޗްޕީއޭ އިން ދިން ހާއްސަ ހުއްދައެއްގެ ދަށުންނެވެ. އެކަމަކު ކޮވިޑް-19 ފެތުރިފައިވާތީ އޭގެ ސަބަބުން އޭއެފްސީ ކަޕްގެ ހުރިހާ ގްރޫޕެއްގެ މެޗުތައް ބޭއްވެން ނެތުމުން އޭއެފްސީން ވަނީ އެ މުބާރާތް ކެންސަލްކޮށްފަ އެވެ. އެ ހިސާބުން މާޒިޔާ އިން ޕްރެކްޓިސް ހުއްޓާލިއެވެ.
މާޒިޔާއިން ފަރިތަކުރުންތައް ފެށި އިރު އެޗްޕީއޭ އާއި އެފްއޭއެމްގެ ގައިޑްލައިނާ އެއްގޮތަށް އަމަލުކުރުމުގެ ގޮތުން ތިން ފޫޓުގެ ގައިދުރުކަން ބެހެއްޓުމާއި ސެނިޓައިޒަރ ބޭނުން ކުރުމާއި ޑިސްއިންފެކްޓް ކުރުމުގެ އާލާތްތައް ބޭނުން ކޮށްފައިވެއެވެ.
Maziya SR began pre-season training today abiding to the guidelines set by Health Protection Agency & Football…
Posted by Maziya Sports & RC on Saturday, 10 October 2020
އާ ސީޒަނަށް ތައްޔާރުވުމަށް ދިވެހި ޕްރިމިއަރ ލީގުގެ ކްލަބުތަކަށް އެޗްޕީއޭން ހުއްދަ ދިނީ މިދިޔަ ހަފްތާ ގައެވެ. އެހެންނަމަވެސް އެފްއޭއެމުން އާ ސީޒަން ފަށާނެ ވަކި ދުވަހެއް އިއުލާނެއް ނުކުރެއެވެ. އެފްއޭއެމުން ބުނީ މިއަހަރު ފަހުކޮޅު ސީޒަން ފެށުމުގެ ތައްޔާރީތައް ވަމުން އަންނަ ކަމަށެވެ. ބޮޑަށް ބެލެވޭ ގޮތުން އަންނަ ޑިސެންބަރު މަހުގެ އަށްވަނަ ދުވަހު ސީޒަން ފެށުމަށް އެފްއޭއެމުން ގެންދަނީ ތައްޔާރީތައް ވަމުންނެވެ.
މާޒިޔާ އިން ކުރިއަށް އޮތް ސީޒަނަށް ތައްޔާރުވަނީ ކޯޗު މުޙައްމަދު ނިޒާމް (ނިޒާމްބެ)ގެ އިރުޝާދުގެ ދަށުންނެވެ. މިދިޔަ ސީޒަނުގައި މާޒިޔާ އަށް ކޯޗު ކޮށްދިން މެސެޑޯނިއާގެ ކޯޗު މަރުޖާން ސެކުލޮސްކީ އެ ޓީމު ދޫކޮށްލީ ކޮންޓްރެކްޓް ހަމަވުމުންނެވެ.
އާ ސީޒަނަށް ތައްޔާރުވުމަށް އެންމެ ފުރަތަމަ ފަރިތަކުރުންތައް ފެށި ޓީމަކީ މާޒިޔާއެވެ.
