މޯލްޑިވްސް ހެރިޓޭޖް ސަރވޭ މަޝްރޫއުގެ ދެވަނަ ފިޔަވަހީގެ އަމަލީ މަސައްކަތްތައް އަންނަ މަހު ފެށުމަށް ތައްޔާރުވަމުން އަންނަކަމަށް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ބުނެފިއެވެ.
މޯލްޑިވްސް ހެރިޓޭޖް ސަރވޭ އަކީ 2018 ވަނަ އަހަރުގެ އޭޕްރީލް މަހު ފެށި ސަރވޭ އެކެވެ. މިއީ އާކޭޑިއޭއިން ޗެރިޓަބަލް ޓްރަސްޓް ފަންޑް ލިބިގެން އޮކްސްފޯޑުގެ އިސްލާމިކް ސެންޓަރގެ ފަރާތުން ޕްރޮފެސަރ މައިކަލް ފީނާ އިސްވެ ހުންނަވައިގެން ކުރިއަށްގެންދެވި ޕައިލެޓް މަޝަރޫއެކެވެ.
އޭރު ސޮއިކުރެވުނީ 2 އަހަރުގެ މުއްދަތައް، ރާއްޖޭގެ 5 އަތޮޅެއް ކަމަށްވާ ހދ، ކ، ލ، ސ އަދި ޏ ހުރި ސަގާފީ މާއްދީ ތަރިކަ ދަފުތަރުކޮށް އާންމުންނަށް ފަސޭހައިން ފެންނާނެ ގޮތަށް އޮންލައިން ޕްލެޓްފޯމެއް ތައްޔާރުކުރުމަށް ކަމަށްވެސް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ބުނެއެވެ. މި މަސައްކަތުގައި ފުރަތަމަ ފިޔަވަހީގެ މަސައްކަތް ނިންމާ، ފަސް އަހަރު ތެރޭގައި މުޅި ރާއްޖޭގައި ހުރި މާއްދީ ސަގާފީ ތަރިކަ ދަފުތަރުކުރުމަށް މިމަޝްރޫގެ ދެވަނަ ފިޔަވައްސެއް ފެށުމަށް މިހާރު ތައްޔާރުވެފައި ވާކަމަށް އެ މަރުކަޒުން ބުނެއެވެ.
ދެވަނަ ފިޔަވަހި ކުރިއަށްގެންދިއުމަށް ހަމަޖެހިފައިވަނީ މެރިޓައިމް އޭޝިއާ ހެރިޓޭޖް ސަރވޭގެ ނަމުގައެވެ. މި ފިޔަވަހީގައި ވެސް އިސްކޮށް މަސައްކަތް ކުރައްވާނީ ޕްރޮފެސާ މައިކަލް ފީނާ އެވެ. އަދި މި ފިޔަވަހި ކުރިއަށްގެންދާނީ ޕްރޮފެސާ މައިކަލް ފީނާ މިހާރު މަސައްކަތްކުރައްވާ، ޖަޕާނުގެ ކިޔޯޓޯ ޔުނިވަރސިޓީގެ ސެންޓަރ ފޯ ސައުތްއީސްޓް އޭޝިއަން ސަޓަޑީޒް އާއި ގުޅިގެންކަމަށްވެސް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ބުނެއެވެ.
މިކަމަށްޓަކާ ކިޔޯޓޯ ޔުނިވަރސިޓީ އާއި ސަގާފީ ތަރިކަ ރައްކާތެރިކުރާ ގައުމީ މަރުކަޒާ ދެމެދު ފަހުމުނާމާއެއް އެކުލަވާލައި ޑިސެމްބަރު ވަނީ ސޮއިކޮށްފައެވެ. ސަގާފީ ތަރިކަ ރައްކާތެރިކުރާ ގައުމީ މަރުކަޒުގެ ފަރާތުން މި ފަހުމުނާމާގައި ސޮއިކުރެއްވީ ފަންނާއި ސަގާފަތާއި ތަރިކައިގެ ވަޒީރު ޔުމްނާ މައުމޫނެވެ. އަދި ކިޔޯޓޯ ޔުނިވަރސިޓީގެ ފަރާތުން ފަހުމުނާމާގައި ސޮއިކުރެއްވީ އެ ޔުނިވަރސިޓީގެ ސެންޓަރ ފޯ ސައުތު އީސްޓް އޭޝިއަން ސަޓަޑީޒްގެ ޑިރެކްޓަރ ޔޯކޯ ހަޔާމީން އެވެ.
ދެވަނަ ފިޔަވަހީގެ އަމަލީ މަސައްކަތް ފެބްރުއަރީ މަހު ފެށުމަށް ތައްޔާރުވަމުންދިޔަ ނަމަވެސް ކޯވިޑް19ގެ ސަބަބުން، މަސައްކަތުގެ ތާވަލަށް ބަދަލުތަށް އައުން އެކަށީގެން ވާކަމަށް ސަގާފީ ތަރިކަ ރައްކާތެރިކުރާ ގައުމީ މަރުކަޒުން ބުނެއެވެ.
