އެމެރިކާގެ ރައީސް ޑޮނަލްޑް ޓްރަމްޕާއި އިޒްރޭލުގެ ބޮޑުވަޒީރު ބެންޔަމިން ނަތަންޔާހޫ ހޯމަ ދުވަހުގެ ރޭ ވައިޓް ހައުސްގައި ބައްދަލުކުރައްވައި، ޣައްޒާގައި ދިރިއުޅޭ ފަލަސްތީނުގެ ރައްޔިތުން އެހެން ގައުމުތަކަށް ބަދަލުކުރުމާ ބެހޭގޮތުން މަޝްވަރާ ކުރައްވާއިފިއެވެ.
ބްލޫ ރޫމްގައި ރޭގަނޑުގެ ފަރިއްކޮޅަށްފަހު ބޭއްވި މި ބައްދަލުވުމުގައި ނަތަންޔާހޫ ހުށަހެޅުއްވީ، ޣައްޒާގެ ރައްޔިތުންނަށް އަވަށްޓެރި ގައުމުތަކަށް ބަދަލުވުމުގެ ފުރުސަތު ދިނުމަށެވެ. އޭނާ ވިދާޅުވި ގޮތުގައި، ޣައްޒާގައި މަޑުކުރަން ބޭނުންވާ މީހުންނަށް އެތާނގައި ދިރިއުޅެވިދާނެ ނަމަވެސް، އެތަން ޖަލަކަށް ނުވާނެ އެވެ.
"އެތަނަކީ ހުޅުވާލެވިފައިވާ ތަނަކަށް ވެގެން މީހުންނަށް މިނިވަން އިޚްތިޔާރު ލިބޭނެ،" ނަތަންޔާހޫ ނޫސްވެރިންނާ ވާހަކަދައްކަވަމުން ވިދާޅުވި އެވެ. އޭނާ އިތުރަށް ވިދާޅުވީ، ފަލަސްތީނު ރައްޔިތުންނަށް ރަނގަޅު މުސްތަގުބަލެއް ހޯދައިދިނުމަށް އެމެރިކާއާއި އިޒްރޭލް އެހެން ގައުމުތަކާ ގުޅިގެން މަސައްކަތް ކުރަމުންދާ ކަމަށެވެ.
"އަޅުގަނޑުމެންނަށް ހިތްހަމަޖެހޭ އަދަދެއްގެ ގައުމުތަކެއް ފެންނަން ކައިރިވެފައިވާ ކަމަށް ގަބޫލުކުރެވޭ،" އިޒްރޭލުގެ ބޮޑުވަޒީރު ވިދާޅުވި އެވެ.
މި ހުށަހެޅުން ފާޅުވުމާއެކު ދުނިޔޭގެ ގައުމުތަކުން، ޚާއްސަކޮށް އަރަބި އިސްލާމީ ގައުމުތަކުން ވަނީ ކަންބޮޑުވުން ފާޅުކޮށްފަ އެވެ. މި މައްސަލައަކީ ބައިނަލްއަގްވާމީ ފެންވަރުގައި ބޮޑު ބަހުސްތަކެއް އުފެދިފައިވާ މައްސަލައެކެވެ.
މި ބައްދަލުވުން ކުރިއަށް ދިޔައީ، އިޒްރޭލާއި ހަމާސްއާ ދެމެދު ގަތަރުގައި ކުރިއަށްދާ ސުލްހަވެރި މަޝްވަރާތަކުގައި ކޮންމެވެސް ވަރެއްގެ ކުރިއެރުމެއް ލިބެމުންދާ ކަމުގެ އަލާމާތްތައް ފެންނަން ފެށި ވަގުތެއްގަ އެވެ. މި މަޝްވަރާތަކަކީ އެމެރިކާގެ އެހީތެރިކަމާއެކު، 21 މަސް ދުވަސް ވެފައިވާ ޣައްޒާގެ ހަނގުރާމަ ނިމުމަކަށް ގެނައުމަށް 60 ދުވަހުގެ ހަނގުރާމަ ހުއްޓާލުމުގެ އެއްބަސްވުމަކަށް ވާސިލުވުމަށް ކުރެވެމުންދާ މަސައްކަތެކެވެ.
ކޮމެންޓު ފޮނުވާ