މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި، 2025 ވަނަ އަހަރުގެ ފުރަތަމަ ފަސް މަސް ދުވަހު ރާއްޖެއިން މަސް އެކްސްޕޯޓް ކުރި މިންވަރު ވަނީ ބޮޑު ތަން ކުރިއެރުމެއް ހޯދާފަ އެވެ.
ޖެނުއަރީން ފެށިގެން މޭ މަހުގެ ނިޔަލަށް ޖުމްލަ 38،800 މެޓްރިކް ޓަނުގެ މަސް ރާއްޖެއިން ބޭރަށް ފޮނުވާފައިވާއިރު، މިއީ 2024 ވަނަ އަހަރުގެ ހަމަ މި މުއްދަތުގައި އެކްސްޕޯޓް ކުރި 23،356 މެޓްރިކް ޓަނާ އަޅާބަލާއިރު 66 ޕަސެންޓުގެ އިތުރުވުމެކެވެ. މިއީ 15،444 މެޓްރިކް ޓަނުގެ އިތުރުވުމެކެވެ.
މި އަހަރުގެ ކޮންމެ މަހަކުވެސް މަސް އެކްސްޕޯޓް ކުރުމުގައި ރަނގަޅު ނަތީޖާ ހާސިލުކުރެވިފައިވެ އެވެ. ޖެނުއަރީ މަހު 5،710 މެޓްރިކް ޓަނުގެ މަސް އެކްސްޕޯޓް ކުރިއިރު، ފެބްރުއަރީ މަހު މި އަދަދު 8،511 މެޓްރިކް ޓަނަށް އަރާފައިވެ އެވެ. މާޗް މަހު 7،376 މެޓްރިކް ޓަނު، އެޕްރީލް މަހު 9،700 މެޓްރިކް ޓަނު އަދި މޭ މަހު 7،499 މެޓްރިކް ޓަނުގެ މަސް ބޭރުކޮށްފައިވެ އެވެ.
އެކްސްޕޯޓް ކުރި މަހުގެ ބާވަތްތަކަށް ބަލާއިރު، ކަޅުބިލަ މަސް އެކްސްޕޯޓް ކުރުމުގައި ފާހަގަކޮށްލެވޭ ފަދަ ކުރިއެރުމެއް ހޯދާފައިވެ އެވެ. މި އަހަރުގެ ފުރަތަމަ ފަސް މަސް ދުވަހު 31،157 މެޓްރިކް ޓަނުގެ ކަޅުބިލަ މަސް އެކްސްޕޯޓް ކޮށްފައިވާއިރު، ފާއިތުވި އަހަރުގެ މި މުއްދަތުގައި ބޭރުކޮށްފައިވަނީ 14،877 މެޓްރިކް ޓަނެވެ. މިއީ ދެގުނައަށް ވުރެ ގިނައިން އިތުރުވި އަދަދެކެވެ.
އެހެން ނަމަވެސް، މަހުގެ ބައެއް ބާވަތްތައް އެކްސްޕޯޓް ކުރި މިންވަރު ދަށަށް ގޮސްފައިވާކަން ފާހަގަކުރެވެ އެވެ. ރީނދޫ އުރަހަ ކަންނެލީގެ ގޮތުގައި ފާއިތުވި އަހަރުގެ މި މުއްދަތުގައި 4،670 މެޓްރިކް ޓަނު އެކްސްޕޯޓް ކޮށްފައިވާއިރު، މި އަހަރު މި އަދަދު 4،002 މެޓްރިކް ޓަނަށް ދަށްވެފައިވެ އެވެ. ހަމަ އެއާއެކު މަސްދަޅު އަދި ޕޯޗްޑް މަހުގެ ގޮތުގައި ފާއިތުވި އަހަރު 3،049 މެޓްރިކް ޓަނު ބޭރުކޮށްފައިވާއިރު، މި އަހަރު މި އަދަދު 2،604 މެޓްރިކް ޓަނަށް ދަށްވެފައިވެ އެވެ.
ޖުމްލަ ގޮތެއްގައި ބަލާއިރު، ރާއްޖޭގެ މަސްވެރިކަމުގެ ސިނާއަތުން އެކްސްޕޯޓް ދާއިރާގައި ހޯދާފައިވާ ކުރިއެރުމަކީ އުއްމީދު ކުރެވޭ ކަމެކެވެ. ޚާއްސަކޮށް ކަޅުބިލަ މަސް އެކްސްޕޯޓް ކުރުމުގައި ހޯދާފައިވާ ބޮޑު ކުރިއެރުމަކީ، ރާއްޖޭގެ އިގްތިސާދަށް މުހިންމު ދައުރެއް އަދާކުރާނެ ކަމެކެވެ.
ކޮމެންޓު ފޮނުވާ