މަސްތުވާތަކެއްޗާ ދެކޮޅަށް މަސައްކަތްކުރާ ބައިނަލްއަގްވާމީ ދުވަހާ ގުޅިގެން ޑްރަގް ކޯޓުން އާންމުކުރި ތަފާސްހިސާބުތަކުން ދައްކާގޮތުގައި، ޑްރަގަށް ފަރުވާ ހޯދާ ނިންމި މީހުންގެ ތެރެއިން 82 ޕަސެންޓް މީހުން އަލުން މަސްތުވާތަކެތި ބޭނުންކުރުމުގެ މައްސަލަތައް ކޯޓަށް ހުށަނޭޅެ ކަމަށް ދައްކައިފިއެވެ.
2011 ވަނަ އަހަރު މަސްތުވާތަކެއްޗާ ބެހޭ ގާނޫނު ތަސްދީގުކޮށް ޑްރަގް ކޯޓު އުފެދުނުފަހުން މިހާތަނަށް އެ ކޯޓަށް 11،700 އަށްވުރެ ގިނަ މައްސަލަ ހުށަހެޅިފައިވާކަމަށް އެ ކޯޓުން ހާމަކުރި އެވެ. މި މައްސަލަތަކުގެ ތެރެއިން 94 ޕަސެންޓަކީ ފިރިހެނުންނާއި ގުޅޭ މައްސަލަތަކެވެ. އަންހެނުންގެ މައްސަލަތައް ހިމެނެނީ 3 ޕަސެންޓްގައި ކަމަށާއި ކުޑަކުދިންގެ މައްސަލަތައް ހިމެނެނީ 2 ޕަސެންޓްގައި ކަމަށް ވެސް އެ ކޯޓުން ބުނެ އެވެ.
ޑްރަގް ކޯޓުން ހާމަކުރި މަޢުލޫމާތުގައިވާ ގޮތުން މިހާތަނަށް 5،148 މައްސަލައެއްގައި ފަރުވާގެ ޕްރޮގްރާމް ފުރިހަމަކޮށް ފަހުގެ ހުކުމް ކޮށްފައިވެ އެވެ. މި މީހުންގެ ތެރެއިން 946 މީހަކު ނުވަތަ 18 ޕަސެންޓް މީހުންގެ މައްސަލަ އަލުން ކޯޓަށް ހުށަހެޅިފައިވާއިރު، 4،202 މީހަކު ނުވަތަ 82 ޕަސެންޓް މީހުން ފަރުވާ ނިމުނު ފަހުން އަލުން މަސްތުވާތަކެތި ބޭނުންކުރުމުގެ މައްސަލަތައް ކޯޓަށް ހުށަހަޅާފައި ނުވެ އެވެ.
އެހެންނަމަވެސް، ފަރުވާގެ ޕްރޮގްރާމްގައި ބައިވެރިވި 2،389 މީހަކު ފަރުވާއިން ވަކިކޮށް ޖަލު ހުކުމް ތަންފީޒުކުރުމަށް ކޯޓުން ވަނީ އަމުރުކޮށްފަ އެވެ. މި ގޮތަށް ޖަލަށް ފޮނުވި މީހުންގެ ތެރެއިން 498 މީހަކު ޖަލު ހުކުމް ތަންފީޒުކޮށް ނިމުނު ފަހުން އަލުން މަސްތުވާތަކެތި ބޭނުންކުރުމުގެ ސަބަބުން ދެވަނަ ފަހަރަށް ކޯޓަށް ހުށަހެޅިފައިވާކަމަށް ޑްރަގް ކޯޓުން ބުނެ އެވެ.
މިއަހަރުގެ މެއި މަހުގެ ނިޔަލަށް ޑްރަގް ކޯޓުގައި 1،376 މައްސަލައެއް ނުނިމި ހުރިކަމަށް އެ ކޯޓުން ބުނެ އެވެ. މި މައްސަލަތަކުގެ ތެރެއިން 1،192 މައްސަލާގައި ހިމެނޭ މީހުންނަކީ ފަރުވާގެ މަރުހަލާގައި ތިބި މީހުން ކަމަށާއި، ރީހެބިލިޓޭޝަން އަމުރު ކުރުމުގެ ކުރީގެ މަރުހަލާގައި 184 މައްސަލައެއް އޮތްކަމަށް ވެސް އެ ކޯޓުން ހާމަކުރެ އެވެ.
ކޮމެންޓު ފޮނުވާ