ޖާސޫސް ކުރިކަމުގެ ތުހުމަތުގައި އެމެރިކާއިން ބޭނުން ވެފައިވާ، ވިކިލީކްސްގެ ބާލީ، ޖޫލިއަން އަސާންޖް އެގައުމާ ހަވާލު ނުކުރެވޭނެ ކަމަށް އިގިރޭސިވިލާތުގެ ކޯޓުން ނިންމައިފިއެވެ. އިގިރޭސިވިލާތުގެ ކޯޓުގެ ފަޑިޔާރު މިގޮތަށް ނިންމާފައިވަނީ، އަސާންޖްގެ ސިއްޙީ ހާލަތަށް ރިއާޔަތް ކުރުމަށްފަހު، އޭނާގެ ނަފްސާނީ މައްސަލަތަށް ހުރި ނިސްބަތުން، އެމެރިކާއާއި ހަވާލުކުރުމަކީ، އަނިޔާވެރިކަމަކަށް ވާނެކަމަށް ގަބޫލު ކުރެވޭތީއެވެ.

އިގިރޭސިވިލާތުގެ ލަންޑަނުގައި ހުންނަ އޯލްޑް ބެއިލީ ކޯޓުގެ، ޑިސްޓްރިކްޓް ޖަޖް، ވެނެއްސާ ބަރައިސްޓަރ، އެމެރިކާގެ ކަމާގުޅޭ އިދާރާތަކުގެ އެދުމާ ދެކޮޅަށް، ކޯޓުގެ މި ނިންމުން ނިންމާފައިވަނީ މި ހަފްތާގެ ހޯމަ ދުވަހުއެވެ.

ކޯޓުން މިހުކުމް އިއްވިއިރު، މަޑުނޫ ކުލައިގެ ގަމީހެއްގައި، މާސްކެއް އަޅައިގެން، ހުރި އަސާންޖް، 49،ގެ މޫނުމަތިން އެއްވެސް ބާވަތެއްގެ އަސަރެއް ފެނިފައެއް ނުވެއެވެ.

ފަޑިޔާރު ބަރައިސްޓަރ ހުކުމް އިއްވަމުން ވިދާޅުވެފައި ވަނީ، "އޭނާއަކީ، ވަރަށް ބޮޑަށް މާޔޫސްވެފައި ހުރި، އަދި ބައެއް ހާލަތްތަކުގައި، ގޮތް ހުސްވެފައި ހުރި މީހެއް،" ކަމުގައެވެ. "އަދި އޭނާ އަމިއްލައަށް ދަންޖެހި މަރުވެގެން ދިޔަ ނުދެވޭނެ ގޮތް ހެދުމަށްޓަކާ، އޭނާ ބަންދު ކޮށްފައި ބަހަޓާ ޖަލުން އަޅާ ފިޔަވަޅުތައްވެސް މުގުރާލުމުގެ ވިސްނުމާއި ޝައުގު އޭނާގެ ކިބައިގައި ވަރަށް ބޮޑަށް އެބަހުރި،" ފަޑިޔާރު ވިދާޅުވެފައި ވެއެވެ.

އޮސްޓްރޭލިއާއަށް އުފަން އަސާންޖް އެމެރިކާގެ ޖަލުތަކުގައި ބަންދު ކޮށްފިނަމަ، "އެެހެން އެއްވެސް ފަރާތަކާއި އެއްވެސް ވަރަކަށް ބައްދަލު ނުކުރެވި، ހަރުކަށި އުސޫލުތަކެއްގެ ތެރޭގައި އޭނާ ބަންދު ކޮށްފައި ބެހެއްޓުމުގެ ފުރުސަތު ވަރަށް ބޮޑުވާނެ" ކަމުގައި ފަޑިޔާރު ވިދާޅުވެފައިވެއެވެ.

"އޭނާއަށް މިހާލަތާ ކުރިމަތިލާން ޖެހެނީ، ޑިޕްރެޝަންއާއި ކުރިމަތިލާންޖެހި، އަމިއްލައަށް ދަންޖެހުމުގެ ވިސްނުން ހުރި މީހެއްކަން، ސިއްޙީގޮތުން ސާބިތުވާން ހުރި ހާލުގައި. އަހަރެން ގަބޫލު ކުރަނީ އަސާންޖު އަމިއްލައަށް ދަން ޖެހިފާނެކަމަށް ބުނާ ބުނުމަކީ ބުރަދަން ހުރި ވާހަކައެއް ކަމުގައި،" ފަޑިޔާރު ވިދާޅު ވެފައިވެއެވެ.

ކުރިންވެސް ހީކުރިގޮތަށް، އަސާންޖުގެ މައްޗަށް އެމެރިކާގައި ޝަރީއަތް ކުރުމަށް މަސައްކަތް ކުރަމުންދާ، އެމެރިކާގެ މުވައްސަސާތަކުން ބުނެފައިވަނީ، އިގިރޭސިވިލާތުގެ ކޯޓުގެ މިނިންމުން އެގައުމުން އިސްތިއުނާފް ކުރާނެކަމުގައެވެ.

އަންގާރަ ދުވަހު ބޭއްވުނު ކަފާލާތުގެ އަޑުއެހުމުގައި، އަސާންޖުގެ ގާނޫނީ ވަކީލު ބުނެފައިވަނީ، އިގިރޭސިވިލާތުގައި އޭނާ ހައްޔަރު ކުރެވިފައިވާ، ސަލާމަތީ ފިޔަވަޅުތައް ވަރުގަދަ، ބެލްމާޝްގެ ޖަލުން އޭނާ މިނިވަންކުރުމަށް އެދިލައްވާނެ ކަމުގައެވެ.

ކޯޓުގައި އަސާންޖުގެ ވަކީލުން ވިދާޅުވެފައިވަނީ، އަސާންޖުގެ މައްޗަށް ކުރަމުންދާ ތުހުމަތުތަކަކީ ސިިޔާސީ ތުހުމަތު ތަކެއްކަމަށާއި އަދި އޭނާގެ މައްޗަށް ކުރާ ދައުވާތަކަކީ ޚިޔާލު ފާޅުކުރުމުގެ މިނިވަންކަމަށް ދެވޭ ހަމަލާއެއް ކަމުގައެވެ.

އެހެންނަމަވެސް، ފަޑިޔާރު ބަރައިސްޓަރ ވަނީ ގާނޫނީ ވަކީލުގެ މިވާހަކަތަކާ ދެކޮޅު ހައްދަވާފައެވެ. އަދި ފަޑިޔާރު ވިދާޅުވީ، އެމެރިކާގެ ރައީސްގެ ފަރާތުން އެމެރިކާގެ ޕްރޮސެކިއުޓަރުންނަށް ޕްރެޝަރ ކޮށްފައިވާ ކަމުގެ ހެކި ދެއްކިފައި ނުވާކަމަށާއި އަދި އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން އަސާންޖާއިމެދު އޮތް ދެކޮޅުވެރިކަމެއްވެސް ފެންނާކަށް ނެތްކަމުގައެވެ.

އަަދި އިތުރަށް ފަޑިޔާރު ވިދާޅުވެފައިވަނީ، އެމެރިކާގައި އަސާންޖަށް އިންސާފުވެރި ޝަރީއަތެއް ނުލިބޭނެ ކަމުގެ ހެއްކެއްވެސް ފެންނާން ނެތްކަމުގައެވެ. އަދި އޭނާގެ އަމަލްތައް ތަހުގީގީ ނޫސްވެރިކަން ފަހަނައަޅާ ގޮސްފައިވާ ކަމަށްވެސް ފަޑިޔާރު ވިދާޅުވެފައި ވެއެވެ.

އިގިރޭސިވިލާތުގެ ކޯޓުގެ ހުކުމަށްފަހު، އަސާންޖަށް ތާއީދުކުރާ ފަރާތްތަކުންވަނީ، ކޯޓުގެ ބޭރުގައި އުފާފާޅުކޮށް، އަސާންޖް މިނިވަން ކުރުމަށް ގޮވާލާފައެވެ.

އިގިރޭސިވިލާތުގެ ކޯޓުގެ މިހުކުމަށްފަހު، މިވަގުތަށް އަދި އަސާންޖު ބެހެއްޓުމަށް ހަމަޖެހިފައި ވަނީ މިހާރުވެސް ހުރި ޖަލުގައި ބަންދު ކޮށްފައެވެ. އެހެންނަމަވެސް، މިހާރު އޭނާގެ ޖިސްމާނީ އަދި ނަފްސާނީ ހާލަތު ވަރަށް ދަށަށް ގޮސްފައިވާކަމަށް، ރަސްމީ ފަރާތްތަކުން ހާމަކުރެވެ.

މިހާރު ބެލެވޭ ގޮތުގައި މިމައްސަލަ ނިމިގެންދާނީ އިގިރޭސިވިލާތުގެ ސްޕްރީމް ކޯޓާ ހަމައިންނެވެ.

އަސާންޖައާއި އޭނާ ހިންގަމުން އައި ވެބްސައިޓް ވިކިލީކްސް އެންމެ ފުތަމަ އާންމު ވެގެންއައީ، އެމެރިކާގެ އެޕާޗޭ ހެލިކޮޕްޓަރަކުން ހަމަލާދީ، އިރާގުގެ އެތަކެއް ސިފައިނާ އަދި ރޮއިޓާސްގެ ދެ ނޫސްވެރިޔަކު މަރާލާ،39 މިނިޓްގެ ވީޑިއޯއެއް އާންމު ކުރި ހިސާބުންނެވެ.