ރާއްޖެއިން ބޭރަށް މަތީ ތައުލީމު ހާސިލުކުރަން ދާ ދަރިވަރުން، ކިޔެވުމުގެ ކުރިން "ރިކޮގްނިޝަން އޮފް ދަ އިންޓެންޑެޑް ޕްރޮގްރާމް" ހޯދަންޖެހޭނެ ކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ބުނެފިއެވެ. މި ލިޔުން ނުހޯދައި ކިޔަވަން ދާ ދަރިވަރުންގެ ސަނަދުތައް ރާއްޖޭގައި ވެލިޑޭޓް ނުކުރެވޭނެ ކަމަށް އެމްކިއުއޭއިން ވަނީ ބުނެފައެވެ.
އެމްކިއުއޭގެ ބަޔާނެއްގައި ފާހަގަކޮށްފައިވާ ގޮތުގައި، ބޭރުގައި ކިޔަވަމުންދާ ބައެއް ދިވެހި ދަރިވަރުން ކިޔެވުން ނިންމާފައި އައިސް ސަނަދު ވެލިޑޭޓް ކުރަން އުޅޭއިރު ބޮޑެތި ދަތިތަކާ ކުރިމަތިލާންޖެހޭ ކަމަށެވެ. މިކަމުގެ އެންމެ ބޮޑު ސަބަބަކީ ކިޔަވަން ދިއުމުގެ ކުރިން އެމްކިއުއޭގެ ހުއްދަ ލިޔުން ހޯދާފައި ނުވުމެވެ.
އެމްކިއުއޭގެ ބަޔާނުގައި ބުނެފައިވާ ގޮތުގައި، ކިޔެވުން ފުރިހަމަކޮށް ސަނަދު ހޯދިކަމުގައި ވިޔަސް، އެ ސަނަދު ރާއްޖޭގައި ގަބޫލުކުރެވޭ ގޮތެއް ނެތުމަކީ ދަރިވަރުންނަށް ދިމާވާ އެންމެ ބޮޑު މައްސަލައެވެ. ސަބަބަކީ އެ ސަނަދު ރާއްޖޭގައި ވެލިޑޭޓް ނުކުރެވުމެވެ.
މި ހުއްދަ ލިޔުން ހޯދުމުގެ މަގްސަދަކީ، ދަރިވަރުން ކިޔަވަން ދާ މަރުކަޒަކީ އެމްކިއުއޭއިން ގަބޫލުކުރާ ތަނެއްކަން ކަށަވަރުކުރުމެވެ. މީގެ އިތުރުން، ކިޔަވާ ޕްރޮގްރާމަކީ އެމްއެންކިއުއެފް ފްރޭމްވޯކާ އެއްގޮތްވާ ޕްރޮގްރާމެއްކަން ޔަގީންކުރުމަށްވެސް މި ލިޔުން ބޭނުންވެއެވެ. އަދި އެ މަރުކަޒަކީ އެ ގައުމުގެ ސަރުކާރުގެ ކަމާބެހޭ އިދާރާއިން ގަބޫލުކުރާ ތަނެއްކަމާއި، ކިޔަވާ ޕްރޮގްރާމް އެ މަރުކަޒުގައި ރަޖިސްޓްރީކޮށްފައިވާކަން ކަށަވަރުކުރުމަށްވެސް މި ލިޔުން މުހިންމުވެއެވެ.
މިހާރުވެސް ހުއްދަ ނުހޯދައި ކިޔަވަން ފަށާފައިވާ ދަރިވަރުން، ވީހާ އަވަހަކަށް މި ލިޔުން ހޯދުމަށް އެމްކިއުއޭއަށް ހުށަހެޅުމަށް އެ އޮތޯރިޓީން ވަނީ އިލްތިމާސްކޮށްފައެވެ. އެހެންނަމަވެސް، ކިޔެވި މަރުކަޒަކީ އެމްކިއުއޭއިން ގަބޫލުނުކުރާ ތަނެއްނަމަ، ސަނަދު ވެލިޑޭޓް ނުކުރެވުމުން ދަރިވަރަށް ލިބޭ ގެއްލުމުގެ ޒިންމާ އެމްކިއުއޭއިން ނުނަގާނެ ކަމަށް އެ އޮތޯރިޓީން ވަނީ ސާފުކޮށް ބުނެފައެވެ.
ވީމާ، ރާއްޖެއިން ބޭރަށް މަތީ ތައުލީމު ހާސިލުކުރަން ގަސްތުކުރާ ދަރިވަރުން، ކިޔަވަން ދިއުމުގެ ކުރިން އެމްކިއުއޭގެ "ރިކޮގްނިޝަން އޮފް ދަ އިންޓެންޑެޑް ޕްރޮގްރާމް" ހޯދުމަކީ ވަރަށް މުހިންމު ކަމެކެވެ.
ކޮމެންޓު ފޮނުވާ