އުތުރާއި މެދުރާއްޖެތެރޭގެ އަތޮޅުތަކަށް ގަދަ ވިއްސާރައާއި ވައިގަދަވުން

ކުރިއަށް އޮތް 24 ގަޑިއިރުގެ ތެރޭގައި ރާއްޖޭގެ އުތުރާއި މެދުރާއްޖެތެރޭގެ އަތޮޅުތަކަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.

އެ އިދާރާއިން ލަފާ ކޮށްފައިވާ ގޮތުގައި ކުރިއަށް އޮތް ދުވަހުގެ ތެރޭގައި ރާއްޖޭގެ އެކި ސަރަހައްދުތަކަށް ވިއްސާރަ ކުރާނެއެވެ. އަދި ބައެއް ރަށްތަކަށް ގުގުރުމާއެކު ވަރަށް ބޯކޮށް ވާރޭ ވެހޭނެއެވެ. ޚާއްސަކޮށް އުތުރާއި މެދުރާއްޖެތެރޭގެ އަތޮޅުތަކަށް ގަދަ ވިއްސާރަ ކުރާނެ އިރު، ދެކުނުގެ އަތޮޅުތަކަށް ކެރީގެ އަސަރުތައް ކުރާނެއެވެ.

ވައިގެ ބާރުމިނަށް ބަލާއިރު، އުތުރާއި މެދުރާއްޖެތެރޭގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު 13 އިން 23 މޭލުގެ ބާރުމިނުގައި ވައި ޖެހޭނެއެވެ. ދެކުނުގެ އަތޮޅުތަކަށް ދެކުނާއި ހުޅަނގުދެކުނުން ގަޑިއަކު 5 އިން 15 މޭލުގެ ބާރުމިނުގައި ވައި ޖެހޭނެ އިރު، ވިލާގަނޑުގައި ގަޑިއަކު 40 މޭލަށް ވައި ގަދަވެދާނެއެވެ.

ކަނޑުގެ ހާލަތަށް ބަލާއިރު، ދެކުނުގެ އަތޮޅުތަކުގެ ކަނޑުތައް އާދައިގެ ވަރަކަށް މަޑުވާނެ ނަމަވެސް، އުތުރާއި މެދުރާއްޖެތެރޭގެ އަތޮޅުތަކުގެ ކަނޑުތައް ވަރަށް ގަދަވާނެއެވެ. ދެކުނުގެ އަތޮޅުތަކަށް ރާޅުގެ އުސްމިން 2 އިން 4 ފޫޓާ ދެމެދު ހުންނާނެ އިރު، އުތުރާއި މެދުރާއްޖެތެރޭގެ އަތޮޅުތަކަށް 4 އިން 7 ފޫޓާ ދެމެދު ރާޅުތައް އުފުލޭނެއެވެ.

ފާއިތުވި 24 ގަޑިއިރުގެ ތެރޭގައި ރާއްޖޭގައި އެންމެ ގިނައިން ވާރޭވެހިފައިވަނީ ނ. މާފަރަށް ކަމަށްވާއިރު، އެ ރަށަށް 66.1 މިލިލީޓަރުގެ ވާރޭ ވެހިފައިވެއެވެ. މިހާރު ރާއްޖެއަށް ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ ކަމަށް މޫސުމާ ބެހޭ އިދާރާއިން ބުނެއެވެ.

މޫސުން ގޯސްވާނެ ކަމަށް ލަފާކުރެވޭތީ، ޚާއްސަކޮށް ކަނޑު ދަތުރުކުރާ ފަރާތްތަކާއި އާންމު ރައްޔިތުން މޫސުމަށް ސަމާލުވުމަށް މޫސުމާ ބެހޭ ޤައުމީ އިދާރާއިން އިލްތިމާސް ކޮށްފައިވެއެވެ. މާދަމާއިން ފެށިގެން ދެކުނުގެ އަތޮޅުތަކަށް މޫސުން ރަނގަޅުވަން ފަށާނެ އިރު، އުތުރާއި މެދުރާއްޖެތެރޭގެ އަތޮޅުތަކަށް އަންގާރަ ދުވަހުން ފެށިގެން މޫސުމުގެ ހާލަތު ރަނގަޅުވާނެ ކަމަށް ލަފާކުރެވެއެވެ.