އިނގިރޭސިވިލާތުގައި ޑިސްޕޯސަބަލް ވޭޕް މަނާކޮށްފި

އިނގިރޭސިވިލާތުގައި މިއަދުން ފެށިގެން އެއްފަހަރު ބޭނުންކޮށްފައި އުކާލާ ޑިސްޕޯސަބަލް ވޭޕްތައް ވިއްކުން މަނާކޮށްފިއެވެ. މިއީ ކުޑަކުދިންގެ ސިއްހަތު ރައްކާތެރިކުރުމަށާއި ތިމާވެށި ހިމާޔަތްކުރުމަށް އެ ގައުމުން އަޅާފައިވާ މުހިންމު ފިޔަވަޅެކެވެ.

ޖޫނިއާ އެންވަޔަރަމަންޓް މިނިސްޓަރު މެރީ ކްރިގް ވިދާޅުވި ގޮތުގައި، ސިންގަލް ޔޫސް ވޭޕްތަކުން މަގުތައް ގޮނޑުވެ، ދަރިން ނިކޮޓިންގެ ވަބާގައި ޖެހެމުންދާތާ ގިނަ ދުވަސްތަކެއް ވެއްޖެއެވެ. މި ޑިވައިސްތައް ކަންމަތީ ފިހާރަތަކާއި ސުޕަމާކެޓްތަކުގައި ވިއްކުން މަނާކުރުމާއެކު، ގާނޫނު ތަންފީޒުކުރުމުގެ މަސައްކަތް ވަނީ ފެށިފައެވެ.

މި ގާނޫނާ ހިލާފުވާ ފަރާތްތަކަށް 200 ޕައުންޑް (269 ޑޮލަރު) ގެ ޖޫރިމަނާއެއް ކަނޑައެޅިފައިވާއިރު، ކުށް ތަކުރާރުކުރާ މީހުންނަށް ދެ އަހަރުގެ ޖަލު ހުކުމެއް ކުރެވިދާނެއެވެ.

2021 ވަނަ އަހަރު އިނގިރޭސިވިލާތަށް ތައާރަފުވި ޑިސްޕޯސަބަލް ވޭޕްތައް، ޗޮކްލެޓް، އަނބު، ކަރާ ފަދަ ވައިދުތަކާއި ރީތި ކުލަތަކުގައި މާކެޓްކޮށްގެން ޒުވާނުންނާއި ކުޑަކުދިންގެ ތެރެއަށް ވަނީ ބޮޑަށް ވަދެފައެވެ. މެޓީރިއަލް ފޯކަސް ނަމަކަށް ކިޔާ އަމިއްލަ ޖަމިއްޔާއަކުން ހާމަކޮށްފައިވާ ގޮތުގައި، 2024 ވަނަ އަހަރު ކޮންމެ ހަފުތާއަކު ގާތްގަނޑަކަށް 5 މިލިއަން ޑިސްޕޯސަބަލް ވޭޕް މަގުތަކަށް އުކާލާފައިވެއެވެ.

މި ވޭޕްތަކުގައި ހިމެނޭ 40 ޓަނަށްވުރެ ގިނަ ލިތިއަމަކީ، 5000 އިލެކްޓްރިކް ގާޑިއަށް ހަކަތަ އުފެއްދުމަށް ބޭނުންކުރެވިދާނެ މިންވަރެކެވެ. މީގެ އިތުރުން، ގޭބިސީތަކުން އުކާލާ ކުނީގެ ތެރޭގައި މި ވޭޕްތައް ހުރުމުން އަލިފާން ރޯވުމުގެ ނުރައްކާ ވެސް ވަނީ އިތުރުވެފައިކަމަށް ފަޔަރ ސާވިސްއިން ބުނެފައިވެއެވެ.

އިލެކްޓްރޯނިކް ކުނި ޕްރޮސެސްކުރާ ކުންފުނި ސްވީޕް ކުއުސަކޮސްކީގެ ކޮމާޝަލް މެނޭޖަރު ޖަސްޓިން ގްރީންއަވޭ ބުނި ގޮތުގައި، ކޮންމެ ވޭޕަކީ ވެސް އަލިފާން ރޯވުމުގެ ނުރައްކާ އޮތް އެއްޗެކެވެ.

މި ގާނޫނު ފުރަތަމަ ހުށަހެޅީ ކުރީގެ ކޮންޒަވޭޓިވް ސަރުކާރުން ކަމުގައިވިޔަސް، މިހާރުގެ ސަރުކާރުން ބައެއް ބަދަލުތަކާއެކު ވަނީ ފާސްކޮށް އަމަލުކުރަން ފަށާފައެވެ. ބެލްޖިއަމާއި ފްރާންސަކީ އީޔޫގައި މިފަދަ ގާނޫނެއް ތަންފީޒުކުރި ފުރަތަމަ ގައުމުތައް ކަމުގައިވާއިރު، އަޔަލެންޑު ވެސް އަންނަނީ މިކަމަށް ތައްޔާރުވަމުންނެވެ.

ނަމަވެސް މި ގާނޫނަށް ފާޑުކިޔާ ފަރާތްތަކުން ބުނާ ގޮތުގައި، މިއީ ވޭޕްކުރުން ހުއްޓުވޭނެ ކަމެއް ނޫންކަމަށާއި، މީހުން ދެން ބޭނުންކުރަން ފަށާނީ ރިފިލްކުރެވޭ ވޭޕްތައް ކަމަށެވެ. އިނގިރޭސިވިލާތުގެ އެންމެ ބޮޑު އޮންލައިން ވޭޕް ވިޔަފާރި ވޭޕް ކްލަބުގެ ޑައިރެކްޓަރު ޑޭން މާޗަންޓް ވިދާޅުވި ގޮތުގައި، މި ގާނޫނުން ހަމައެކަނި މަނާވަނީ ވޭޕް ވިއްކުން ކަމަށާއި، ބޭނުންކުރުން މަނައެއް ނުވާ ކަމަށެވެ. އޭނާ އިތުރަށް ބުނީ މިއީ ނުރައްކާތެރި ބާވަތްތަކުގެ ކަޅު ބާޒާރެއް އުފެދިދާނެ ކަމެއް ކަމަށެވެ.