ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރު އަދި މަހާޒު އަލީ ޒާހިރު ވަކިކުރުމުގެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލާފައިވަނީ ގާނޫނާ ޚިލާފަށްކަމަށް ރައްޔިތުންގެ މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ވިދާޅުވެއްޖެއެވެ.
މި މައްސަލަ ދިރާސާކުރި މަޖިލީހުގެ ޖުޑިޝަރީ ކޮމިޓީއަށް ދެއްވި ލަފައިގައި ފިލްޒާ ވިދާޅުވެފައިވަނީ ޖޭއެސްސީން މި ސުލޫކީ މައްސަލަ ބަލާފައިވަނީ އިޖުރާއަތްތައް ފުރިހަމަނުކޮށް ކަމަށެވެ. ފިލްޒާގެ ބަހުން ދޭހަވަނީ މި މައްސަލަ ބަލާފައިވަނީ ޖުޑީޝަލް ސާވިސް ކޮމިޝަންގެ ގާނޫނު ނަންބަރު 10/2008 ގައި ބަޔާންކުރާ "މައްސަލަ ބެލުމާމެދު ގޮތެއް ނިންމާ ކޮމިޓީ"ގެ ދައުރެއް ނެތި ކަމަށެވެ.
މައްސަލަ ރިޕޯޓުގައި ބަޔާންކޮށްފައިވާ ގޮތުގައި، މި މައްސަލައަކީ ޖޭއެސްސީއަށް އަމިއްލަ ފަރާތަކުން ހުށަހެޅި ސިޓީއެއް ނަމަވެސް، މައްސަލަ ބަލަން ފަށާފައިވަނީ ޖޭއެސްސީން އަމިއްލައަށް އިސްނަގައިގެންނެވެ. މިކަން ފާހަގަކުރައްވަމުން ފިލްޒާ ވިދާޅުވީ ގާނޫނުގައި ބަޔާންކުރާ ގޮތުން މިފަދަ މައްސަލައެއް ބެލުމާމެދު ގޮތެއް ނިންމަންޖެހޭނީ 3 މެންބަރުންގެ މައްޗަށް އެކުލެވޭ މައްސަލަ ބަލާ ކޮމިޓީއަކުން ކަމަށެވެ. ނަމަވެސް މިފަދައިން އަމަލުކޮށްފައިނުވާތީ، ޖޭއެސްސީން އަމަލުކޮށްފައިވަނީ ގާނޫނުގައި ކަނޑައަޅާފައިވާ އިޖުރާއަތްތަކާ އެއްގޮތަށް ނޫންކަމަށް ފިލްޒާ ވިދާޅުވެފައިވެއެވެ.
ހާއްސަކޮށް ފާހަގަކުރެވޭ ކަމަކީ، މި މައްސަލައިގައި ހުރި ކަންބޮޑުވުންތައް ހިއްސާކުރުމަށް ޖުޑީޝަރީ ކޮމިޓީއަށް ހާޒިރުވުމަށް ދެ ފަނޑިޔާރުން އެދިވަޑައިގެންފައިވީ ނަމަވެސް އެ ފުރުސަތު ދޭން ނުނިންމުމެވެ. އަދި ބާ ކައުންސިލުން ވެސް ޖޭއެސްސީގެ ނިންމުން ރަނގަޅުތޯ ބެލުމަށް އެދިފައިވާކަންވެސް ފާހަގަކުރެވެއެވެ.
މީގެއިތުރުން، ޒާތީ މައުލޫމާތު ހުރިކަމަށް ބުނެ ފަނޑިޔާރުން މަގާމުން ވަކިކުރުމަށް ޖޭއެސްސީން ނިންމި ނިންމުން ދިރާސާކުރުމަށް ބޭއްވި ކޮމިޓީ ބައްދަލުވުން ވަނީ ސިއްރުކޮށްފައެވެ.
މި މައްސަލައާ ގުޅިގެން ހިއުމަން ރައިޓްސް ކޮމިޝަން (އެޗްއާރްސީއެމް) އިން ވެސް ކަންބޮޑުވުން ފާޅުކޮށް ބަޔާނެއް ނެރެފައިވެއެވެ. އެގޮތުން ފަރުދަކާމެދު ކުރެވޭ ތުހުމަތުތަކަކީ ކޮބައިކަން ސާފުކޮށް އެނގެންޖެހޭނެ ކަމަށާއި، އެފަރާތަކުން އަމިއްލަ ދިފާއުގައި ލިޔުމުންނާއި އަނގަބަހުން ޖަވާބުދާރީވުމުގެ ހައްގާއި ގާނޫނީ ވަކީލެއްގެ އެހީތެރިކަން ލިބުމުގެ ހައްގު ވެސް ލިބެންޖެހޭނެ ކަމަށް އެޗްއާރްސީއެމްއިން ވަނީ ބުނެފައެވެ.
ފަނޑިޔާރު އަޒްމިރާލްދާ އާއި ފަނޑިޔާރު މަހާޒު ވަކިކުރުމަށް ޖޭއެސްސީން ނިންމީ، އަޒްމިރާލްދާގެ ފިރިކަލުން ޑރ. އިސްމާއީލް ލަތީފް މަސާޖު ޕާލާއަކުން ހައްޔަރުކުރުމާ ގުޅިގެން ބަންދުން ދޫކޮށްލުމަށް، ކްރިމިނަލް ކޯޓުގެ ގާޒީ ސޮފްވަތު ހަބީބު މެދުވެރިކޮށް މައްސަލަ ބެއްލެވި ގާޒީ އިބްރާހީމް ޒިހުނީއަށް ގުޅައި ނުފޫޒު ފޯރުވިކަމުގެ ތުހުމަތުގައެވެ. ޖޭއެސްސީން ނިންމާފައިވަނީ އެ ތުހުމަތުތައް ދެ ފަނޑިޔާރުންގެ މައްޗަށްވެސް ސާބިތުވާކަމަށެވެ.
ޖުޑީޝަރީ ކޮމިޓީން މައްސަލަ ބަލައި ނިމުމުން، ދެން އޮންނާނީ ދެ ފަނޑިޔާރުން ވަކިކުރުމާމެދު ރައްޔިތުންގެ މަޖިލީހުގެ ތަޅުމުން ގޮތެއް ނިންމުމެވެ. ގާނޫނުގައިވާ ގޮތުން ދެ ފަނޑިޔާރުން ވަކިކުރެވޭނީ ރައްޔިތުންގެ މަޖިލީހުގެ ތިންބައިކުޅަ ދެބައިގެ މެންބަރުންގެ ވޯޓުންނެވެ.
ކޮމެންޓު ފޮނުވާ