މޫސުމާބެހޭ ޤައުމީ އިދާރާއިން މިއަދު މުޅި ރާއްޖެއަށް ހުދު ސަމާލެއް ނެރެފިއެވެ. މިއީ ވައިގަދަވެ ކަނޑުގަދަވުމުގެ ސަބަބުން ދިމާވެދާނެ ނުރައްކަލަކަށް ރައްޔިތުން ސަމާލުވުމަށް ނެރެފައިވާ އިންޒާރެކެވެ.
އިދާރާއިން ހާމަކުރެއްވިގޮތުގައި މި ސަމާލު ދެމިއޮންނާނީ މިއަދު އިރުއޮއްސޭ ވަގުތު، 06:15 އާ ހަމައަށެވެ. މި ވަގުތުތަކުގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހުމާއި، ވިލާގަނޑުގައި 40 މޭލަށް ވައިގަދަވުމުގެ ފުރުޞަތު އޮތްކަމަށް އިދާރާއިން ލަފާކުރެއެވެ. މިއާއެކު ކަނޑުތައްވެސް ގަދަވާނެކަމަށް ބެލެވެއެވެ.
މިހާރު ކުރަމުންދާ ހުޅަނގު މޫސުމުގެ ވިއްސާރައިގެ ތެރެއިން ރާއްޖޭގެ އެކި ސަރަހައްދުތަކަށް މޫސުން ގޯސްވުން ކުރިއަށް އޮތް ތިން ދުވަހުގެ ތެރޭގައި ތަޖުރިބާކުރަން ޖެހިދާނެކަމަށް އިދާރާއިން ވަނީ އިންޒާރުދީފައެވެ.
މޫސުމާބެހޭ ޤައުމީ އިދާރާއިން ޚާއްޞަކޮށް ކަނޑުދަތުރުފަތުރުކުރާ ފަރާތްތަކަށް އިލްތިމާސްކުރައްވާފައިވަނީ މޫސުމަށް ސަމާލުކަންދީ، ރައްކާތެރިކަމުގެ ފިޔަވަޅުތައް އެޅުމަށެވެ. ވައިގަދަވެ ކަނޑުގަދަވުމުގެ ސަބަބުން ކަނޑުދަތުރުފަތުރުކުރުމުގައި އެކަށީގެންވާ ނުރައްކާތަކެއް ހުރިކަން އިދާރާއިން ފާހަގަކުރައްވައެވެ.
ކޮމެންޓު ފޮނުވާ