ސިއްޙީ ނިޒާމު ފުޅާކޮށް ޒަމާނީކުރުމަށް އިތުރު ނަރުހުން ބޭނުންވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ބައިނަލްއަޤްވާމީ ނަރުހުންގެ ދުވަހާ ގުޅިގެން ފޮނުއްވި ތަހުނިޔާގެ ޚިޠާބުގައެވެ.
ނަރުހުންގެ ދުވަހާ ގުޅިގެން ފޮނުއްވި ތަހުނިޔާގެ ޚިޠާބުގައި، ރައީސް މުއިއްޒު ނަރުހުންނަކީ ރެޔާއި ދުވާލު ވަރުބަލިވުމެއް ފޫހިކަމެއްނެތި ޚިދުމަތްކުރާ ބައެއްކަން ފާހަގަކުރައްވައި، އެބޭފުޅުންގެ އަގު މި ސަރުކާރުން ވަޒަންކުރާނެކަމަށް ވިދާޅުވިއެވެ. އަދި ނަރުހުންގެ އަޑުއަހައި، އެބޭފުޅުންނަށް ފައިދާހުރި ކަންތައްތައް އިސްކަންދީގެން ފަހިކޮށްދޭނެކަމަށްވެސް އެމަނިކުފާނު ވިދާޅުވިއެވެ.
އެހެންނަމަވެސް، މި ސަރުކާރަށް އަހަރަކަށްވުރެ ގިނަ ދުވަސްވެފައިވާއިރު، ނަރުހުންގެ ކުރިއެރުމަށް އެހާ ބޮޑު މަސައްކަތެއް ކޮށްފައިނުވާކަން ފާހަގަކުރެވެއެވެ. އަދި މިސަރުކާރާއެކު ރާއްޖޭގެ ސިއްޙީ ނިޒާމު ދަށްވެ، ކުރިން ލިބެމުންދިޔަ ބައެއް ޚިދުމަތްތަކާއި ބޭސްތައްވެސް ނުލިބޭކަމުގެ ޝަކުވާތައް އިތުރުވެފައިވެއެވެ.
ރައީސް މުއިއްޒު އިތުރަށް ފާހަގަކުރެއްވިގޮތުގައި، ރާއްޖޭގައި ޚިދުމަތްކުރާ ނަރުހުންގެ 92 އިންސައްތައަކީ އަންހެނުންނެވެ. މިކަމުން ދޭހަވަނީ ބުރަ، ގައުމީ އަދި އިންސާނީ ޚިދުމަތްތައް ފޯރުކޮށްދިނުމުގައި ދިވެހި އަންހެންދަރިން އަދާކުރާ އަގުހުރި ދައުރުކަމަށް އެމަނިކުފާނު ވިދާޅުވިއެވެ. އަދި ގައުމަށް ބޭނުންތެރި މި ޚިދުމަތުގައި ދިވެހިންގެ ނިސްބަތް އިތުރުކުރުމަކީ ސަރުކާރުގެ އަމާޒެއްކަންވެސް ރައީސް ފާހަގަކުރެއްވިއެވެ.
ނަރުހުންގެ މަސައްކަތުގެ ބުރަކަން ފާހަގަކުރައްވައި، ރައީސް މުއިއްޒު ވިދާޅުވީ ނަރުހެއްގެ މަސައްކަތަކީ ވަށައިޖެހި، އެތައްކަމެއް އެކުވެފައިވާ، ބޮޑު މަސްއޫލިއްޔަތެއްކަމަށެވެ. ނަރުހުން ބަލިމީހާއާއި، ޢާއިލާއާއި، ޑޮކްޓަރާ މުޢާމަލާތު ކުރަމުން، ހާލުބަލަމުން، ބޭސްފަރުވާ ދޭންޖެހޭކަމަށާއި، ބައެއް ޙާލަތްތަކުގައި ބަލިމީހުންނަށް ކާންދީ، ތާހިރުކުރަންވެސް ޖެހޭކަމަށް ރައީސް ފާހަގަކުރެއްވިއެވެ.
ނަރުހުންގެ ޚިދުމަތަކީ، ދެވޭ މުސާރައަށްވުރެ ބޮޑަށް ސަވާބާއި ދަރުމަ، އަދި އަނެކުންގެ ފުށުން ލިބޭ ހިތްހެޔޮކަމާއި ހެޔޮ ދުޢާ، އެތައް ގުނައަކަށް އިތުރު، މާތް މަސައްކަތެއްކަމަށްވެސް ރައީސް މުއިއްޒު ވިދާޅުވިއެވެ.
އަދި މީސްމީޑިއާގައި ކުރެއްވި ޕޯސްޓެއްގައިވެސް ރައީސް މުއިއްޒު ފާހަގަކުރެއްވީ ފަރުވާ ދިނުމަށް ހަސްފަތާލުތަކުން މަރުހަބާ ކިޔަނީ، އަދި ބަލި ފަސޭހަވެ އެނބުރި ދިއުމާ ހަމައަށް ޚިދުމަތުގައި ދެމިތިބެނީ މުރާލި ނަރުހުންކަމަށާއި، ކޮންމެ ދުވަހަކު އެތައް ބަޔަކަށް އޯގާތެރިވުމުގައި، ހިނިތުންވުމާއެކު ކުރަމުންދަނީ މުޅި ގައުމު ފަޚުރުވެރިވާ މަސައްކަތެއްކަމަށެވެ. އެމަނިކުފާނު ދިވެހި ނަރުހުންނަށް އިތުރު ކުރިއެރުމާއި ކާމިޔާބީއަށް އެދިވަޑައިގެންފައިވެއެވެ.
ކޮމެންޓު ފޮނުވާ