ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން އާރްޓީއެލް ފެރީގެ ހިދުމަތް ފަށާފައިވަނީ ބެކަޕް ލޯންޗުތައް ނުބާއްވައި ކަމަށް ޓްރާންސްޕޯޓް މިނިސްޓަރު މުހައްމަދު އަމީން ރައްޔިތުންގެ މަޖިލީހުގައި ވިދާޅުވެެއްޖެއެވެ. މިނިސްޓަރު މިހެން ވިދާޅުވީ ވައިކަރަދޫ ދާއިރާގެ މެމްބަރު ހުސެއިން ޒިޔާދު ކުރެއްވި ސުވާލަކަށް ޖަވާބު ދެއްވަމުންނެވެ.
ޒިޔާދު ސުވާލުގައި ފާހަގަކުރެއްވި ގޮތުން އުތުރު ޒޯންގައި ހިދުމަތްދޭ 13 ލޯންޗުގެ ތެރެއިން 8 ލޯންޗް މަރާމާތަށް ގެންގޮސްފައިވުމުގެ ސަބަބުން ގިނަ ދަތުރުތައް ކެންސަލްވަމުންދާ ކަމަށެވެ. މިކަމާ ގުޅިގެން މިނިސްޓަރު އަމީން ވިދާޅުވީ އާރްޓީއެލް ފެރީތަކަކީ ވަކި ފެންވަރެއްގައި، ވަކި ސަޕްލަޔަރެއްގެ އަތުން ގަނެފައިވާ އުޅަނދުތަކަކަށް ވާތީ، މައްސަލައެއް ދިމާވުމުން މަރާމާތުކުރަން ގިނަ ވަގުތު ނަގާ ކަމަށެވެ.
"އެހެންވުމުން ލޯންޗަކަށް މައްސަލައެއް ދިމާވެއްޖެ ނަމަ އޭގެ ބަދަލުގައި ބޭނުން ކުރާނޭ އުޅަނދެއް ނޯވޭ. ބެކަޕް އުޅަނދެއް ނެތީމާ މި މައްސަލަ މި ދިމާވަނީ. މަރާމާތަށް ވަގުތުވެސް ނަގަނީ" މިނިސްޓަރު އަމީން ވިދާޅުވިއެވެ.
މިނިސްޓަރު އިތުރަށް ވިދާޅުވެފައިވަނީ އާރްޓީއެލް ފެރީއަށް ހިނގާ ހަރަދުގެ 80 ޕަސަންޓް ސަރުކާރުން ސަބްސިޑައިޒް ކުރަންޖެހޭ ކަމަށާއި، މިއީ ދައުލަތަށް ވަރަށް ބޮޑު ބުރައެއް ކަމަށެވެ. އޭނާ ހާމަކުރެއްވި ގޮތުގައި އާރްޓީއެލްގެ ހިދުމަތް ފުރަތަމަ ފެށި އަހަރު ސަބްސިޑީގެ ގޮތުގައި ސަރުކާރުން 48 މިލިއަން ރުފިޔާ ހޭދަކޮށްފައިވާއިރު، މިދިޔަ އަހަރު 130 މިލިއަން ރުފިޔާ ހޭދަކޮށްފައިވެއެވެ. އަދި މި އަހަރު ނިމޭއިރު އެ އަދަދު 280 މިލިއަން ރުފިޔާއިން މައްޗަށް އަރާނެ ކަމަށް ވެސް އޭނާ ވިދާޅުވިއެވެ.
ނަމަވެސް މިހުރިހާ ގޮންޖެހުންތަކާއެކުވެސް، މިނިސްޓަރު އަމީން ވިދާޅުވީ އާރްޓީއެލް ފެރީގެ ހިދުމަތް އިތުރަށް ފުރިހަމަކުރުމަށް މި ސަރުކާރުން މަސައްކަތްކުރަމުންދާ ކަމަށާއި، މިހާރު މަސައްކަތްކުރަނީ ސަބްސިޑީ ލެވެލް 55 ޕަސަންޓަށް ކުޑަކޮށް، ރިކަވަރީ 45 ޕަސަންޓް ހައްލުކުރެވޭނެ މޮޑިއުލްއަކަށް ގެންދިޔުމަށް ކަމަށެވެ.
ކޮމެންޓު ފޮނުވާ